Çĕнĕ тĕл пулусем, фильмсем...

Халăхсен хушшинчи Шупашкарти кинофестиваль малалла ĕçлет. Илемлĕ фильмсен тата наци киностудийĕсен конкурс программисемсĕр пуçне тата вун-вун мероприяти иртет республика тĕп хулинче, çавăн пекех кăçал "культура территорийĕ" ята тивĕçнĕ Патăрьелпе Хĕрлĕ Чутай районĕсенче.

Шупашкарти "Волжский" кинотеатр çак кунсенче "Мосфильм - 90 çулта" ятарлă программăпа ĕçлет. Унта асăннă киностуди хăй вăхăтĕнче ÿкернĕ фильмсене кăтартаççĕ. Вĕсем: "Иван Васильевич меняет профессию", "Кубанские казаки", "Карнавальная ночь", "Мы из джаза", "Зимний вечер в Гаграх" тата ытти те. Çакна та палăртни вырăнлă: шăпах асăннă фильмсенче усă курнă хăш-пĕр тумпа тата вĕсене ÿкернине сăнланă кадрсемпе паллашма май пулчĕ те "Çеçпĕл" кинотеатрти фойере.

"Фестивальсен фестивалĕ" программа та пуян. Куравçăсем Алексей Германăн "Трудно быть богом", Алексей Федорченкон "Небесные жены луговых мари", Хоаким Лафоссăн "После любви" ĕçĕсемпе паллашма ĕлкĕрчĕç ĕнтĕ. Сандра Неттельбекăн "Последняя любовь мистера Моргана", Жан-Марк Валлен "Долласский клуб покупателей" фильмĕсем те хăйсен куравçисене кĕтеççĕ.

Кĕçĕн çултисене Узбекистан режиссерĕн Камара Камаловăн "Горькая ягода", "Дикарь", "Чужое счастье", "Дорога над небесами" фильмĕсем тыткăнлĕç.

Наци библиотеки çак кунсенче Халăхсен туслăх çуртне аса илтерет. Унта наци киностудийĕсен фильмĕсен конкурсĕ иртет. Асăнса хăварар: çак конкурса Чăваш Енрен "Нарспи" фильм /режиссерĕ Андрей Васильев/ та хутшăнать. Чăваш кинорежиссерĕсен ытти ĕçĕпе ЧР Патшалăх электрон тата кинодокументаци архивĕн кинозалĕнче паллашма май пур. Çак кунсенче унта Юрий Спиридоновăн "Муса Мусалаев. Путь воина" документлă фильмне, Владимир Карсаковăн "Юхха" илемлĕ картинине кăтартнă. Куравçăсем "Юхха" ĕçри Ольга Осипова тата Владимр Янтуш ролĕсемпе кăмăллă юлнă.

Кинофестивале республика тулашĕнче пурăнакан ентешсем те хутшăнаççĕ. Сăмахран, Беларуçрре пурăнакан Дмитрий Михлеев кинорежиссер, сценарист, писатель Тутарстанри чăваш ялĕнче çуралса ÿснĕ. Вăл Шупашкара килсех çÿрет. Эпир те ун пирки "Хыпарта" пĕр хут çеç мар каласа кăтартнă. Йăхташăмăр "Беларусьфильмра" чылай вăхăт ĕçленĕ, документлă фильмсем ÿкернĕ. Илемлĕ фильмсенчен вара куравçăсем патне çаксене çитернĕ: "По секрету всему свету", "Три веселые смены", "Воля вселенной", "Шахтеры".

Тепĕр ентеш, Дмитрий Михлеевпа танлаштарсан, çамрăк-ха. Сăмахăм - 1976 çулта Çĕнĕ Шупашкарта çуралнă Анатолий Гущин пирки. Вăл 1998 çулта Щепкин ячĕллĕ театр училищи пĕтернĕ, пĕр вăхăт Николай Губенко ертсе пыракан "Таганка актерĕсен пĕрлĕхĕ" театрта ĕçленĕ. Анатолий Воропаев продюсер компанийĕн спектаклĕсене хутшăнать. Куравçăсем ентешĕмĕр калăпланă Чонкин салтак рольне ас тăваççех пулĕ. Çав фильмра вăл "Çумăр çăвать" юрра чăвашла янраттарса пире савăнтарчĕ. Анатолий Гущин çавăн пекех "Звезда", "Егерь", "Парни из стали", "Желанная", "Вий" тата ытти ĕçсенче ÿкереннĕ.

Ентешĕмĕр юн кун И.Н.Ульянов ячĕллĕ Чăваш патшалăх университетĕнче студентсемпе тĕл пулчĕ.