Çамрăксен туслăхĕ çирĕп

И.Н.Ульянов ячĕллĕ ЧПУн А.А.Кокель ячĕллĕ Ÿнер музейĕнче В.И.Суриков ячĕллĕ Мускав патшалăх университечĕн ÿнер институчĕн Хусанти филиалĕн студенчĕсен ĕçĕсен куравĕ уçăлчĕ.

Картинăсене паллă художник çуралса ÿснĕ Патăрьел районĕнчи Турхан ялĕнче иртнĕ Кокель пленэрĕнче ÿкернĕ. Пурĕ - 42 ĕç. Тĕнче шайĕнчи çак пленэр, Украинăн тава тивĕçлĕ художникĕ А.Чередниченко каланă тăрăх - Чăваш Енĕн сăнарлă искусствин сăн-сăпатне туллин уçса парать.

Студентсем пурнăçĕнчи пĕлтерĕшлĕ пĕрремĕш курава чăвашсен профессионал искусствине никĕсленĕ Алексей Кокеле халалланă. Сăрă ăстисен вĕрентекенĕ, Раççей Федерацийĕн тата Тутар Республикин тава тивĕçлĕ художникĕ З.Шмаев çамрăксен ăсталăхĕ пленэр кунĕсенче самаях ÿснине палăртать.

Вернисаж вăхăтĕнче И.Н.Уль­янов ячĕллĕ ЧПУ тата çĕршыври паллă ÿнер шкулĕн филиалĕ малашне тачă çыхăнса ĕçлеме килĕшсе татăлчĕç. Халăхсен пĕрлĕхĕн уявне паллă тунă кунсенче уçăлнă курав Чăваш Ен тата Тутарстан, нумай нациллĕ Раççей çамрăкĕсен туслăхĕ çирĕппине кăтартса пачĕ.

В.ВАСИЛЬЕВ.

культурологи докторĕ, профессор