Çамрăксем хаçат киоскĕн тĕлне пĕлмеççĕ

Чăвашла тухса тăракан хаçат-журнала, паллах, ытларах ял çынни вулать. Çамрăксем кăларăмсене электрон майпа тишкерме кăмăллаççĕ.

Юратнă кăларăма киосксенче çырăнакан-туянакан та пур. Шăпах вĕсемпе тĕплĕнрех паллашас тĕллевпе «Чăваш пичечĕн» киоскĕсене çитсе килтĕмĕр.

Пĕчĕк çулçÿреве «Андриян Николаев космонавт урамĕ» чарăнура вырнаçнинчен пуçларăмăр. Кунта эрнесерен «ЧХ» вуникĕ номерĕ çитет иккен.

- Эрне вĕçĕччен вĕсен хуçи тупăнатех. Тепĕр чухне темиçе номер сутăнманни пулать, - пĕлтерчĕ киоск ĕçченĕ.

Тепĕр чарăну - «Чувашия» хăна çурчĕ. Кунти киоска эрнесерен «Чăваш хĕрарăмĕн» 5 номерĕ килет. Ирина Кубарева сутуçă вулакансем ытларах ваттисем пулнине асăнчĕ.

Афанасьев урамĕнче вырнаçнăскере хаçатăн 8 номерĕ тивĕçет. Çамрăк сутуçă кăларăм питĕ хăвăрт саланнине, номерсем юлманнине пĕлтерчĕ.

- Пĕр çынсемех килеççĕ. Юратсах вулаççĕ, - терĕ вăл.

Богдан Хмельницкий урамĕнчи киоскри сутуçă калаçасшăн пулмарĕ. Кунта эрнесерен «Чăваш хĕрарăмĕн» 5 номерĕ çитнине пĕлтерчĕ те малалли ыйтусене хуравлама килĕшмерĕ.

- Пуçлăхсемпе калаçмалла, - терĕ кинемей.

Журналистсен куçĕ тĕлне пулнă тепĕр киоск «Шупашкар трикотажĕ» чарăнура вырнаçнă. Любовь Корышева кунта 20 çул ĕçлет.

- Хаçат туянакансем пурте 40 урлă каçнăскерсем. Ытларах чухне пĕр çынсемех туянаççĕ. Çамрăксем алла хаçат тытса вуламаннине шута илсе вĕсене валли урăхла йышшисене шухăшласа кăлармалла-тăр. «Чăваш хĕрарăмĕ» пирĕн пата эрнесерен 6 экземпляр çитет. Кăмăлласах вулаççĕ-тĕр - питĕ хăвăрт саланать, - пĕлтерчĕ кăмăллă хĕрарăм.

«Кăнтăр» пасарĕ çывăхĕнче пурăнакан халăх чăвашла тухса тăракан кăларăмсене вулать-ши тата? Пасарпа юнашар вырнаçнă киоскра тăрăшакан Антонина Антонова кунта кăларăмăн 10-11 номерĕ килнине пĕлтерчĕ.

- Çынсем ытларах вырăсла тухса тăракан кăларăмсене туянаççĕ пулин те чăвашлисемпе те кăсăкланаççĕ. Юратсах вулаççĕ. Шел, аслă çултисем çеç. Пĕр çамрăк та киоска хаçат вулассишĕн пымасть, - чунран пăшăрханчĕ ăшшăн калаçнă май.

Эпир тĕл пулнă кашни сутуçă хаçата ытларах вăтам тата аслă çултисем туяннине пĕлтерчĕ. Çамрăксем ăна пачах туянмаççĕ иккен.

Татьяна НАУМОВА.