Зоя СЫВЛĂМПИ.

Пит тĕлĕнтермĕш асанне,
Туссемĕр, манăн пур.
Тупать-çке култарма майне,
Шÿтлет хăй ай тур-тур...
Чунпа вăл çав тери пуян,
Пĕлет хăй темĕн те...
Алла пачах тытман туя
Пулсан та çитмĕлте.
Ĕçчен те йăрă çав тери —
Чупса çÿрет кăна.
Мĕнре сăлтавĕ тетĕр-и?
Савмасть чир-чĕр ăна...
Çинçе те йăрăс пулнăран
Ман кив япаласем
Ахаль выртмаççĕ. Йăлт унра —
Ик ĕмĕрлĕ вĕсем.
Кĕске кĕпе те ним те мар
Мĕн-ма парас юта?
Бейсболка, çĕлĕк, шăлавар —
Йăлтах каять хута.