Апрель уйăхĕнчи ĕçсем

10 Ака, 2015

Сенĕкпе е кĕреçепе садри йывăçсем тавра тата рет хушшинчи çĕре чавса тухатпăр. Тымарсене сиенлетесрен асăрханăр. Йывăç вулли çумĕнче 5-6 см тарăнăш кăна чавăр.
Апрельте улма-çырла йывăççисем ÿсме тытăнаççĕ, кун пек чухне вĕсене азот удобренийĕпе ?шĕвеккипе% апатлантарни пĕлтерĕшлĕ. Мочевинăна 1 тăваткăл метра 9-13 г, аммиак селитрине 12-15 г хывмалла. Чăх-чĕп каяшĕпе апатлантарас пулсан ăна 10-12 хут шывпа хутăштармалла.
Çĕр пиçсе çитсессĕн улма-çырла йывăççисем лартма тытăнмалла. Малтан шăтăк хатĕрлĕр, унти çĕр ăшăнсан лартма пуçлăр. Папка çуриччен йывăçсене лартса пĕтермелле.
Çĕр пиçсе çитнине пĕлес тесен ăна алла илĕр, ывăçласа чăмăртăр та ирĕке ярăр ?кăкăр шайĕнче тытмалла%. Вăл çăмăллăн сапаланчĕ пулсан çĕр ытлашши типнĕ. Енчен те пачах та саланмасан - пиçсе çитмен, чавма иртерех. Алăри чăмакка йăванса кăшт саланчĕ пулсан чавма тытăнăр.
Апрель çурринче çĕршывăн вăтам тăрăхĕсенче уçă çĕр çине редис акма юрать. Унăн вăрлăхĕшĕн 3 градус сивĕ те хăрушă мар, анчах вăл типĕ сывлăшпа çĕре пачах та килĕштермест.
Çĕр çырли тĕммисене типнĕ тата чирлĕ çулçăсенчен тасатăр, кăпкалатăр. Çуркунне вĕсен тымарĕ çаралать, çавăнпа кăпкалатнă чухне тăпра купаласа хупмалла. Анчах асăрханăр: "чĕрине" ан хуплăр!
Ăшă теплицăсенче хăяр, кабачок, кавăн вăррисене акма юрать. Кайран калчасене уçă çĕр çине е пленка айне куçарса лартăр.

Хресчен сасси

Ял хуçалăхĕ

Пахчара