Харсăр

Çуллахи ăшă ир. Куçĕ уçăлманнине пăхмасăр тăваттăри Кирилл вырăн çинчен тăрса картишне тухнă. Хĕвел çÿле хăпарса çитеймен-ха. Йĕри-тавра вара кайăксем юрлани, автансем авăтни, кĕтĕве тухнă ĕнесем макăрни илтĕнет. Çулла ялтах лайăх çав!

Йĕри-тавра пăхса çаврăннă арçын ача. Ашшĕпе-амăшĕ курăнмасть - эппин, ĕçе кайма ĕлкĕрнĕ. Ытти чухне çемье Канаш хулинче пурăнать-ха. Каникула вара Яковлевсем хуларан 14 çухрăмра вырнаçнă Шаккăл ялĕнче ирттереççĕ.