Стоматолог волонтерсен юхăмĕ вăй илет

Паян «Хулари стоматологи поликлиники» автономи учрежденийĕн инноваци технологийĕсен ăслăлăхпа вĕрентÿ центрĕнче «Чăваш Республикинчи медицина ыр кăмăллăхçисене аталантарасси» ятпа çавра сĕтел иртрĕ.

Медицина чăн-чăн тухтăршăн професси çеç мар, вăл — пурнăç йĕрки те. Çынсен шăла вăхăтра сиплемелле. Мĕншĕн тесен чирлĕ шăл тĕрлĕ инфекци пуçарма пултарать. Стоматолог тухтăр волонтерсем шăп çак енпе хастар ĕçлеççĕ те: республикăри шкул çулне çитмен тата шкул çулĕсенчи вĕренÿ учрежденийĕсене çитсе ачаран сывă пурнăç йĕркине хăнăхма, шăла вăхăтра тасатса тĕрлĕ инфекцирен хăтăлма вĕрентеççĕ.

Чăваш Республикинчи стоматологсен ассоциацийĕ тĕлпулура «Сывă шăл — сывă ачасем — сывă наци» волонтер юхăмĕн презентацине тата «Халăха сывă шăл тата сывă пурнăç йĕрки урлă сыватасси» çĕнĕ проекта кăтартрĕ.

«Çавра сĕтел» вăхăтĕнче волонтерсем пĕр-пĕрин ăсталăхĕпе, çавăн пекех программăсемпе, акцисемпе, мероприятисемпе паллашма май тупрĕç, проект йĕркелÿçисемпе ертÿçисем хăйсен ĕçĕ-хĕлĕ пирки туллин тата тĕплĕн каласа кăтартрĕç.

Чăваш Енре ыр кăмăллăхçăсен юхăмне малашне те аталантарас, ăна вăйлатас тĕллевпе «Чăваш Республикинчи стоматологсен ассоциацийĕ» ЧР Сывлăх сыхлавĕн министерствипе тата «Волонтер-медиксем» уйрăмпа пĕрле ĕçлесси пирки виçĕ енлĕ килĕшĕве алă пусрĕç, çавăн пекех 2018-2019 çулсенче волонтер ĕçĕ-хĕлĕпе çыхăннă çĕнĕ проектсене пурнăçа кĕртессине сÿтсе яврĕç.