Юнпа расна пулсан та...

Наци библиотекинче темиçе çул ĕнтĕ «Наци культурисен залĕ» ĕçлет. Çак кунсенче унта ЧР культура министрĕ Вадим Ефимов республикăри наци культура пĕрлĕхĕсен ертÿçисемпе тĕл пулчĕ.

Вадим Петрович вĕсене Чăваш Енри наци тата тĕнсем хушшинчи хутшăнусене çирĕплетес тĕлĕшпе пурнăçланă ĕçсемшĕн тав турĕ. Республикăра хальхи вăхăтра халăхсен этнокультурине аталантарас ĕнĕпе 33 общество организацийĕ ĕçлет. Кăçалхи февраль уйăхĕнче, тепĕр пĕрлĕхе - Çĕнĕ Шупашкарти çармăссен наци культура автономине - регистрациленĕ.

Министерство 2015 çулта та обществăри социаллă тăнăçлăха упраса хăварас енĕпе пĕрлĕхсемпе тачă çыхăну тытĕ, вĕсен социаллă проекчĕсене пурнăçа кĕртме пулăшĕ. Финанспа экономика сферинчи çăмăл мар лару-тăру пулин те. Март уйăхĕнче кăçал «Раççей нацийĕн пĕрлĕхне çирĕплетесси тата Чăваш Республикинчи халăхсен этнокультурине аталантарасси» прграммăн уйрăм мероприятийĕсене пурнăçлама республика бюджетĕнчен субсиди уйăрса пама пуçлĕç. Çав шутра çак проктсене шута илĕç: азербайджансен, узбексен, таджиксен «Навруз» уявне* мордва халăх пултарулăхĕн регионсен хушшинчи «Арта» фестивальне* наци культурисен «Раççей халăхĕсен пĕрлехи çемйи» республика фестивальне* тутарсен «Сабантуй» наци уявне* нимĕçсен «Остерн» наци уявне* вырăс халăх пултарулăхĕн Пĕтĕм Раççейри «Янра, Раççей кĕтесĕ» фестивальне.

Çавăн пекех Чăваш Республикинчи халăхсен этнокультура пурнăçĕнчи паллă пулăмсен шутне Пĕтĕм чăвашсен «Акатуй» уявне, наци культура пĕрлĕхĕсен пултарулăх ушкăнĕсен «Туслăх кăшăлĕ» фестивальне те кĕртнĕ.

Тĕл пулăва хутшăннисем Пĕтĕм Раççейри азербайджансен конгресĕн регионти уйрăмĕн пуçарăвне - «Наци йăли-йĕркисен ярмăркки» - проектне, «Казаксен культура центрĕ» общество организацийĕн Луганск облаçĕнчи ачасене пулăшассипе çыхăннă ыйтăвне ырласа йышăнчĕç.

Аслă Çĕнтерĕвĕн 70 çулхи юбилейне халалласа та наци культура обществисем «Пирĕн пĕрлехи Çĕнтерÿ» ярăмпа темиçе мероприяти йĕркелеме палăртрĕç.

Н.ГЕОРГИЕВА