Социаллă программăсем валли - тата 13 млн тенкĕ

Чăваш Ен Пуçлăхĕ Михаил Игнатьев пуçарнипе Социаллă программăсене финансламашкăн укçа-тенкĕ ытларах уйăрма палăртнă. Шăмăршă районĕнчи социаллă ыйтусене тивĕçтерекен центрăн вăхăтлăх пурăнмалли уйрăмĕн çурчĕн строительствине вĕçлемешкĕн тата 13 млн тенкĕ куçарнă. Социаллă программăна укçа-тенкĕпе РФ Пенси фончĕпе Чăваш Республикин Правительстви çурмалла тивĕçтернĕ май çак суммăна республика бюджетĕнчен уйăрнă.

2014 çулта РФ Пенси фончĕ Чăваш Республикин Социаллă программине пурнăçламашкăн 15,6 млн тенкĕ хывнă. Шăмăршă районĕнчи центрсăр пуçне аслă ăру çыннисен "Вега" сиплев центрне, Муркаш районĕнчи социаллă ыйтусене тивĕçтерекен центра тата Кÿкеçри ача-пăча интернат çуртне тĕпрен юсамашкăн нухратпа пулăшнă.

Раççей Пенси фончĕ регионсен социаллă программисене вĕсен бюджетĕнчен пĕрешкел виçепе уйăрмалли условие тĕпе хурса 2000 çултанпа финанслать. Асăннă тапхăрта вăл пирĕн республикăри пулăшу учрежденийĕсен пурлăхпа техника никĕсне çирĕплетмешкĕн тата юсамашкăн 270 млн тенкĕ уйăрнă.