Професси енĕпе хатĕрленме – тепĕр центр

Канашри транспортпа энергетика техникумĕнче «Промышленноç тата инженери технологийĕсем» направленипе професси хатĕрленĕвĕ тухма пулĕ. Çакна тума унта тин çеç уçăлнă Профессие маларах хатĕрленмелли центр май парать.

Палăртмалла: республикăра вăл çак тĕллеве пурнăçлакан иккĕмĕш центр ĕнтĕ. Ăна хута яма федераци бюджетĕнчен 20 млн ытла тенкĕ уйăрнă. Çурта юсаса çĕнетмешкĕн республика бюджетĕнчен 63 млн ытла тенкĕ кайнă. Çакнашкал пĕрремĕш центр вара 2021 çултанпа Шупашкарти химипе механика техникумĕнче ĕçлет.
Иккĕмĕш центра уçма Чăваш Ен Пуçлăхĕ Олег Николаев та хутшăннă.

— Çак вĕренӳ лапамĕ пулăшнипе эпир специалистсене хăвăрт хатĕрлес, вĕсене çĕнĕ пĕлӳ парас, Владимир Путин палăртнă çĕршыв аталанăвĕшĕн пĕлтерĕшлĕ ыйтусене пурнăçлама хăнăхусене вăйлатас майсене ӳстеретпĕр. Профессие маларах хатĕрленмелли центр педагогсемшĕн, вĕренӳ организацийĕсемшĕн те çĕнĕ майсем уçать, - тенĕ республика ертӳçи.

Канашри транспортпа энергетика техникумĕн директорĕ Ильсур Назмутдинов палăртнă тăрăх, центр пулăшăвĕпе 12-65 çулсенчи çынсем усă кураяççĕ: шкул ачисем, студентсем, педагогсем, декрет отпускĕнчи хĕрарăмсем, ĕçсĕррисем, ватлăх енне сулăннисем. Вĕсем вĕренмелли уйрăм плана хатĕрлемешкĕн консультаци те илееççĕ, профориентаци мероприятийĕсене хутшăнаяççĕ, хăйсене профессире тĕрĕслесе пăхаяççĕ, вĕренӳ программисемпе пĕлӳ илееççĕ.

Сăмах май, 2025 çул вĕçнелле центрта 4 пинрен сахал мар çынна пĕлӳ пама, 800-е яхăн шкул ачине профориентаци ĕçне хутшăнтарма, пуласлăхпа çыхăннă компетенцисен программисене 10-ран сахал мар хатĕрлеме палăртнă.

www.hypar.ru