Сăрă-лак шăршинчен

Çуллахи вăхăтра пӳртри ĕçсем валли вăхăт çитмест. Юсава ял хуçалăх ĕçĕсене вĕçлесен тума тивет. Çакăнта япăххи нимех те çук. Пӳрт ăшчикки çĕнелни хăтлăх кӳрет, кăмăла çĕклет.

Юсав ĕçĕсем лак-сăрăсăр иртмеççĕ тесен те юрать. Анчах вĕсен шăрши хĕллехи вăхăтра пушшех те нумайрах вăхăт тăрать пӳлĕмре. Çакă кама пит килĕштĕр? Шăрша епле хăвăртрах пĕтерме пулать-ха?

Пӳрте уçăлтарни. Юсав ĕçĕсем вĕçленсен чӳречесене уçса лайăх уçăлтармалла. Анчах сивĕ çанталăкра уçă чӳречепе нумай пурăнаймăн. Вăйлă шăршă пĕтсессĕн юлнă шăрша пĕтермелли меслетсем:

•  Пӳлĕме кăштах тăвар ярса ирĕлтернĕ шыв янă савăтсем лартса тухăр. Вăл шăрша, наркăмăшлă газсене туртса илет. Шыва кунне икĕ хутчен улăштарăр. Тăварлă шыв вырăнне ахаль таса шыв та лартма юрать.
•  Кофе. Унăн шăрши вăйлă. Вăл, паллах, сăрă-лак шăршине туртса илмест, ăна хуплама çеç пулăшать. Темиçе чашкă кофе хатĕрлесе тĕрлĕ çĕре лартмалла.
•  Йывăç кăмрăкĕ — вăйлă абсорбент. Вăл кирек мĕнле шăрша та туртса илет. Тахçанах мар çунтарнă йывăç кăмрăкне савăтсене хурса пӳрте тĕрлĕ çĕре лартса тухмалла. Шăршă хăвăртах пĕтĕ.
•  Эфир çăвĕсем. Аптекăра пĕтнĕк çăвĕ е ваниль экстракчĕ туянăр. Темиçе тумлам тумлатнă шыв савăчĕсене лартса тухăр. Лак, краска, ытти шăршă туйăнми пулать.
•  Çурта. 4-5 парафин çуртана /ырă шăршăлли мар/ çутса темиçе тĕле лартăр. Лакран, краскăран тухакан çунакан газсем çурта çулăмĕпе çунса пĕтĕç.