Чăваш Енре этноэкспедици йĕркелесшĕн

Чăваш Енре этноэкспедици йĕркелес шухăша РФ Президенчĕ çумĕнчи Нацисен хушшинчи хутшăнусем енĕпе ĕçлекен канашăн членĕ, Этноссем хушшинчи журналистика гильдийĕн ертÿçи, «Национальный акцент» хаçат тата интернет-портал тĕп редакторĕ Маргарита Лянге Чăваш Енĕн информаци политикин тата массăллă коммуникацисен министрĕпе Александр Ивановпа ĕнер, çурла уйăхĕн 21-мĕшĕнче, тĕл пулсан палăртнă.

Маргарита Лянге «Раççей тĕрĕкĕсем» Пĕтĕм Раççейри фестивале килнĕ. Аса илтерер: ăна Шупашкар хула кунне уявланă май çурла уйăхĕн 19–20-мĕшĕсенче йĕркелерĕç.

Хăна министра «Этноэкспедици» проектпа паллаштарнă. Унăн тĕллевĕ – журналистсем çĕршывăн тĕрлĕ регионĕпе паллашасси, кайран, хăйсен тăван тăрăхĕнче, ыттисен пурнăçĕ çинчен каласа кăтартасси. Маргарита Лянге шухăшланă тăрăх, Чăваш Енпе паллаштармалли, пирĕн тăрăхăмăр çинчен каласа кăтартмалли çителĕклех.