Архив - 26 Фев, 2014 - Хыпар

Республика Пуçлăхĕ Михаил Игнатьев тунти кун Çĕмĕрле хулинче пулчĕ. Малтанах муниципалитетăн 8-мĕш гимнази ĕç-хĕлĕпе паллашрĕ. Кунта 625 ача вĕренет. Информацин хăватлă тытăмне йĕркеленĕ. Вĕренÿ ĕçĕнче виçĕ компьютер класĕпе, конференц-залпа, автоматизациленĕ NetSchool тытăмпа усă кураççĕ.

Республикăри тĕрĕслевпе сăнав органĕсем пĕр вăхăт ĕç тăвакан влаç органĕсене, ку тытăмра тăрăшакансен шухăшĕпе - сăлтавпа та, сăлтавсăр та - куçран вĕçертменни çинчен шав пулчĕ. Чăваш Енре ку çивĕч ыйтăва федерацин Атăлçи округĕнче чи малтан çĕклерĕç.

Тăвай енре - ЧНК уйрăмĕ

Тăвай районĕнче Чăваш наци конгресĕн вырăнти уйрăмне йĕркеленĕ. Унăн канашне 15 çынран суйланă.

Йыша шкулсенчи чăваш чĕлхипе литература вĕрентекенсем, библиотекарьсем, халăх музейĕн директорĕ, чăвашлăха упраса хăварассишĕн чунран тăрăшакан шур сухалсем кĕнĕ. Канаш тилхепине тытса пыма Тăвай район администрацийĕн пуçлăхĕн пĕрремĕш çумне - АПК аталанăвĕпе экологи пайĕн ертÿçине Валерий Чайкина шаннă.

Чăваш Енре туризма аталантарас енĕпе йĕркеленĕ Координаци канашĕн анлă ларăвне икĕ министерство - ЧР Культура тата Физкультурăпа спорт - ĕçченĕсем хутшăнчĕç. 2013 çулхи раштав уйăхĕччен яваплă çак тивĕçе физкультурăпа спорт министерстви пурнăçласа пыратчĕ.

Унăн ятне халĕ Раççей кăна мар, пĕтĕм тĕнче пĕлет. Вăл - пăр çинче эрешлесе ярăнакан хĕрсенчен чи пултарулли те чи сумли. Пике Чăваш Енре пурăнакансемшĕн те çывăх: 17 çултах Олимп тÿпине çĕкленнĕ спортсменка - Совет Союзĕн Геройĕн Александр Кочетовăн /1919-1994/ мăнукĕн хĕрĕ.

Культура çулталăкĕ пуçланичченех Чăваш патшалăх оперăпа балет театрĕн балет труппи хамăрăн культурăна чикĕ леш енче пропагандăлама пуçланă. Труппăн пултарулăх ертÿçи Данил Салимбаев ертсе пынă ушкăн Германи, Швейцари, Итали, Польша, Австри çĕр-шывĕсенче гастрольте пулнă. Чăваш ташă ăстисем П.Чайковскин "Лебединое озеро", "Щелкунчик", "Спящая красавица", Л.Минкусăн "Дон Кихот" балечĕсене кăтартнă.

Чăваш патшалăх ÿнер музейĕнче Раççей Художниксен союзĕн членĕн Любовь Костенко ÿнерçĕн "Любовь Костенко тĕнчи. Лондон. Париж. Амстердам" куравĕ ĕçлет.

Регион аталанăвĕн "Содружество" фончĕн пуçарăвĕпе çак вăхăтра Наци библиотекинче Польша режиссерĕн, сценарисчĕн, общество ĕçченĕн Кшиштоф Зануссин фильмĕсен вунă кунлăхĕ пырать.

Тĕп хулари культура объекчĕсенчен паллăраххисем - П.П.Хусанкай ячĕллĕ культура керменĕ /"Çĕнтерÿ" асăну комплексне кĕрет/ тата "Салют" культура керменĕ - кăçал сăн-сăпатне тĕпрен улăштарĕç.

Республикăра Культура çулталăкне тивĕçлĕ шайра ирттерме палăртаççĕ. Йăлана кĕнĕ фестивальсемпе конкурссемсĕр пуçне çĕннисем те, кăçал ятарласа йĕркелекеннисем, пулĕç. Сăмахран, "Хамăр тата пулас ăрусем валли вулатпăр" проект. Интернет сасăлав кăтартăвне тĕпе хурса чăвашсен паллă писателĕсен аудиокĕнекисен ярăмне кăларассипе çыхăннă вăл. Шупашкар хула администрацийĕн "Пултарулăх бульварĕ" арт-проекта та асăнса хăвармалла.