ПИТ ÇИНЕ — ПĂРÇА

Пăрçа йышшисем питĕ тутлăхлă пулнипе палăрса тăраççĕ. Вĕсенче пирĕн ÿте кирлĕ ÿсен-тăран белокĕ пур.

Йĕркеллĕ ÿт валли. Маскăпа уйрăмах çулталăкăн сивĕ тапхăрĕнче эрнере 1-2 хут усă курмалла. Сивĕ шыва çур стакан пăрçа ярса 4 сехет лартмалла. Унтан шывне улăштармалла та пăрçана çемçеличчен пĕçермелле. Тÿсе нимĕрлемелле, 1 апат кашăкĕ хăйма хушса пăтратмалла.

Маскăна пите тата мăя сĕр­мелле. 20-25 минутран ÿте ăшă шывпа çуса тасатмалла та тоникпа сăтăрмалла.

Типĕ ÿт валли. Маска ÿте лайăх тутлăлантарать, якатать. Кофе арманĕпе 2 апат кашăкĕ типĕ пăрçана авăртмалла. Пăрçа çăнăхне тин вĕренĕ шывпа пăтă пуличчен пăтратмалла.

Хутăша кăштах сивĕнме памалла та 1 апат кашăкĕ олива çăвĕ ярса пăтратмалла. Кăшт сивĕнсен таса пите 20 минута сĕрмелле. Сивĕ шывпа çуса тасатмалла.

Çуллă ÿт валли. Консервланă симĕс пăрçана 2 апат кашăкĕ илсе нимĕрлемелле, 2 апат кашăкĕ турăхпа е тăпăрчă шывĕпе хутăштармалла.

Маскăна таса ÿте сĕрмелле. 20 минутран ăшă шывпа çуса тасатмалла. Ÿте тутлăхлă япаласемпе тивĕçтернисĕр пуçне маска ăна çусăрлатать те.

Ватăлакан ÿт валли. Пĕçернĕ шурă шалча пăрçине /фасоль/ вĕриллех 1 апат кашăкĕ илсе нимĕрлемелле. 2 чей кашăкĕ лимон сĕткенĕ тата 2 чей кашăкĕ майонез хушмалла, лайăх пăтратмалла.

Ăшă маскăна ÿте 20 минута сĕрмелле. Ăшă шывпа çуса тасатмалла та пите эмел курăкĕн /ромашка аптечная/ сивĕрех шĕвекĕпе чÿхемелле. Шĕвек рецепчĕ: 1 апат кашăкĕ чечеке тин вĕренĕ 1 стакан шыва ямалла, сивĕниччен лартмалла, сăрăхтармалла.

Кирек мĕнле ÿт валли. Маска ÿте тутлăхлă япаласемпе пуянлатать, шуратать. Пĕçернĕ шурă нимĕç пăрçине /бобы/ 1 апат кашăкĕ илсе нимĕрлемелле. 1 чей кашăкĕ шĕвĕ пыл, 1 чей кашăкĕ лимон сĕткенĕ, 1 апат кашăкĕ панулми нимĕрĕ хушса пăтратмалла.

Маскăна пите сĕрмелле. 20 минутран ăшă шывпа çуса тасатмалла.

Васкавлă пулăшу. Çак маска тутлăхлă япаласемпе тивĕçтерет, уçăлтарать, ÿт тонусне лайăхлатать, шуратать. Консервланă симĕс пăрçана 1 апат кашăкĕ илсе нимĕрлемелле, пĕçернĕ çăмарта саррине вĕтетсе тата 1 чей кашăкĕ тип çу хушса пăтратмалла. Ытла çăра пулсан консервланă пăрçа шывне кăштах хушма юрать.

Хутăша пите сĕрмелле. 20 минутран ăшă шывпа çуса тасатмалла.