Тĕрĕс çулпа пыракансемшĕн тĕнче алăкĕ те уçăлать

1997 çул. Комсомольскинчи культура çурчĕ. Кунта, лăк тулли залра, «Тав» фирма хăйĕн партнерĕсене чыслать. Сцена çине республика влаçĕн элчисем черетленсе хăпарчĕç. «Александр Петрович Капитонов ертсе пыракан «Тав» фирма пек предприятисем республикăра вунпилĕк-çирĕм пулсан ял хуçалăхне экономика кризисĕнчен туртса кăларатпăрах... Эсир халăх ырлăхĕшĕн малашне те çанă тавăрса ĕçлессе, çĕнĕ çитĕнÿсемпе савăнтарасса эпир пĕрре те иккĕленместпĕр», - терĕç А.Капитоновпа унăн командине чĕререн тав туса.

Унтанпа вунсакăр çул иртрĕ. Апла пулин те асăмра вăл шупкаланмарĕ, ĕнер çеç пулнăн куç умĕнче тăрать. Чи пахи вара - сумлă хăнасем каланисем чăнлăха тухни: А.Капитонов чăн-чăн профессионалсене хăй тавра пуçтарса «Тав» компание çеç мар, çут тĕнчене илсе килнĕ «Çĕрулмине мухтав» агрофирмăна та Раççей, НППП /Никама пăхăнман патшалăхсен пĕрлĕхĕ/ шайне çити çĕклерĕ.

Юлашки çулсенче, республикăна Михаил Игнатьев ертсе пыма тытăннăранпа, предприяти пархатарлă ĕçне тата та анлăлатрĕ. Çакă хăйĕн тытăмне тĕпрен çĕнетнинчен те нумай килчĕ теессĕм килет. Кăна агрофирмăн генеральнăй директорĕ Хасиятулла Идиатуллин та çирĕплетрĕ. «Эпир çĕнĕ технологисене хамăрăн ĕçĕмĕре кĕртсе аталанăвăн тепĕр тапхăрне куçрăмăр. Специалистсен ăс-хакăлĕпе пултарулăхне тĕпе хурса предприятие тăватă ушкăна пайлани, çав вăхăтрах вĕсем кирлĕ чухне пĕр-пĕрне улăштарма пултарни хăватсене ÿстерсе пыма май парать», - терĕ Хасиятулла Семигуллович.

Эпир пынă кун гендиректор сăмахĕсем тĕрĕссине хамăр курса ĕнентĕмĕр. Çĕрулми пуссинче Германи комбайнĕсем шултра улмасене хăйсемех кăлараççĕ, тасатаççĕ, бункер тулса çитсен трактор тележки çине те хăйсемех пушатаççĕ. Уяр çанталăкпа тухăçлă усă курса ĕлкĕрес тесе-тĕр тепĕр хире хамăрăн копалкăна та кăларнă. Ун хыççăн йăтăнса тухакан йышлă çĕрулмине хĕрарăмсем пуçтараççĕ, михĕсене тултараççĕ, арçынсем тулли çыхăсене автомашинăсем çине тиесе управ «склачĕсене» ăсатаççĕ. Малалла вулас...