Комментировать

19 Дек, 2013

БАНАН ÇИСЕН ХУППИНЕ АН ПĂРАХĂР

Ыраттарнă ÿт çине банан хуппине шал енĕпе хумалла. Çак компресс ура хыттинчен те хăтăлма пулăшать. Сываличченех сипленмелле.

Тарăн тăрăннă шăрпăк çине каçхине çывăрма выртас умĕн банан хуппине шал енĕпе хумалла. Ир енне вăл пинцетпа çаклатса илмелĕх курăнакан пулать. Компресс валли хăмăр пăнчăсем палăрма пуçланă сарă банан юрăхлăрах.

Сыпăсем тата мышцăсем ыратсан вĕтетнĕ 4-6 хуппа çур литр лайăх шурă эрехе ямалла, тĕттĕм вырăнта 5 эрне лартмалла. Çак настойкăпа çĕрлене хирĕç ыратакан вырăнсене сăтăрмалла, унтан ăшă япалапа çыхмалла.

Шыçă чирĕсенчен хÿтĕленме тата организма пĕтĕмĕшле çирĕплетме Болотов банан квасĕ хатĕрлеме пулать. Пăнчăсемсĕр, лайăх пиçнĕ 3-4 банан хуппине çумалла, вакламалла, 5 литр кĕрекен кĕленче савăта хумалла. 1 стакан сахăр, 3 литр вĕренĕ сивĕ шыв, 1 апат кашăкĕ хăйма хушмалла. Савăт анине марльăпа çыхса тĕттĕм сулхăн вырăна /сивĕтмĕше мар/ 2 эрнене лартмалла. Çиеле пухăннă симĕс сие илсе пăрахмалла. Сăрăхтармалла. Кунне 2-3 хут апатчен çур сехет маларах 150-шар грамм ĕçмелле.

Шăла шуратас килет-и? Çăвара ăшă шурă эрехпе чÿхесе илĕр те шăлсене 2 минут банан хуппин шал енĕпе сăтăрăр. Вĕсем кофе ĕçнипе е сигарет туртнипе саралнă пулсан ытларах вăхăт сăтăрмалла. Çапла кашни ир-каç.

Компьютерпа нумай вăхăт ĕçленипе ывăннă куçа хупмалла та хупанкисем çине банан хуппи хумалла.

Пит маски. Пите лосьонпа е шывпа çуса тасатмалла та ун çине банан хуппине шал енĕпе 10 минута хумалла. Ăшă шывпа çуса ямалла. Ÿт çемçелет, нÿрелет.

Африкăра пурăнакансем хура пăнчăсем çук банан хуппине лайăх уçăлтаракн пÿлĕмсенче типĕтеççĕ. Унтан кофе арманĕпе авăртаççĕ те çăтă хупăнакан кĕленче савăтра упраççĕ. Çак çăнăхпа шĕвĕрĕлченрен сипленеççĕ. Ăна кунне 3 хут апатчен çĕçĕ вĕçĕпе хыпса çăтаççĕ.