Комментировать

Шупашкарта пурăнакан Валентина Кожендаева 43 çул шкулта ĕçленĕ. «Яланах çÿллĕ кĕлĕллĕ пушмакпа çÿренĕ. Урок вăхăтĕнче кашни ачана çывăхрах пулма тăрăшнă — сĕтел хушшинче ларман. Ватлăх куçран пăхсан ура ыратма пуçларĕ. Федерацин травматологи, ортопеди, эндопротезировани центрĕнче чĕркуççи сыппине улăштарчĕç. Ĕнер чĕркуççи çине хытах ÿкрĕм те Хула клиника 1-мĕш больницин травматологи уйрăмне выртма лекрĕ», — каласа кăтартать хĕрарăм. Елчĕк районĕнчи Зоя Краснова вĕче шăммин сыппине улăштарнă хыççăн реабилитаци курсĕ витĕр тухать. Операциччен 3 çул вырăнпа выртнă вăл. Халĕ, хăй каланă тăрăх, ташлама та пултарать.

Ĕнер Хула клиника 1-мĕш больницинче йĕркеленĕ пресс-турта реабилитаци хальхи йышши технологисемпе паллаштарчĕç. Вĕсем пулăшнипе çын хăвăртах вăй илет.

Инсульт, пуç мими суранланнă хыççăнхи реабилитаци уйрăмĕнче механотерапи, эрготерапи, физиотерапи пÿлĕмĕсем ĕçлеççĕ. Кунта утма вĕрентекен, ал-урана ĕçлеттерекен тĕнче стандарчĕпе килĕшсе тăракан аппаратсем пур.

Реабилитаци уйрăмĕн пуçлăхĕ Кирилл Нестерин палăртнă тăрăх, çакăнта амбулаторие хăйсен тĕллĕн çÿрейменнисем — ытларах чухне утайманнисем — сиплев курсĕ витĕр тухаççĕ. Тухтăрсем пулăшнипе чирлисен сывлăхĕ палăрмаллах лайăхланать. Инсульт чăтса ирттернисенчен кашни пиллĕкмĕшĕ сывалса çитсе ĕçе пуçăнать. Ыттисене виççĕмĕш, иккĕмĕш, пĕрремĕш ушкăн инваличĕсен йышне кĕртеççĕ. «Пирĕн тĕллев — пĕрремĕш ушкăн инваличĕсене — иккĕмĕш, иккĕмĕшĕнчен виççĕмĕш ушкăна куçарасси», — тет Кирилл Валерьевич. Çак уйрăмра çуллен 1500 çын сиплев курсĕ витĕр тухать.

www.hypar.ru

Марина ТУМАЛАНОВА. Автор сăн ÿкерчĕкĕсем.