Комментировать

Çу уйăхĕн 11-мĕшĕнче ЧР транспортпа çул-йĕр хуçалăхĕн министрĕ Владимир Иванов тата федерацин «Волго-Вятскуправтодор» хысна учрежденийĕн пуçлăхĕ Илдар Мингазов пресс-конференци ирттерчĕç.

М-7 «Атăл», Р-176 «Вятка», А-151 /Çĕрпÿ-Ульяновск/ автоçулсен Чăваш Енри сыпăкĕсем /325 çухрăм/ учрежденин оперативлă управленийĕнче шутланаççĕ. Кăçал «Волго-Вятскуправтодор» федераци трассин Çĕрпÿ, Шупашкар, Куславкка районĕсенчи пилĕк сыпăкне /29,6 км/ тĕпрен юсаттарма тытăнать, çулталăк вĕçлениччен 10,7 çухрăма çĕнеттерет. Кунсăр пуçне федерацин Шупашкар, Çĕрпÿ, Етĕрне районĕсенчи тăватă участокне /25 км/ юсама палăртнă. Çавăн пекех 2018 çулта Çĕрпÿ-Ульяновск автоçулăн 10 çухрăма тăсăлакан сыпăкне, чи малтан пурнăçа кĕртмелли «Хăрушлăха кĕртсе ÿкермен тата паха çулсем» проектпа килĕшÿллĕн Шупашкара хĕвел тухăç енчен М-7 «Атăл» трассăран кĕмелли тата Р-176 «Вятка» çул çинчи сыпăксене ĕçе кĕртме пăхнă.

Килес çул М-7 «Атăл» çулăн Етĕрне районĕнчи участокне /6 км/ çĕнетесшĕн, кăçал Сăр çинчи кĕпер юсавне тăсасшăн.

И.Мингазов водительсем питĕ кĕтекен хыпара та пĕлтерчĕ: кăçал Аслă Çавал урлă хывнă кĕпере юсаса пĕтерĕç. Ăна уçма республикăна килетĕпех терĕ. Вăл тата В.Иванов министр журналистсен ыйтăвĕсене хуравларĕç. Вĕсемпе «Хыпар» хаçатăн çитес ытларикунхи номерĕнче паллаштарăпăр.