Кашлатăр çăкалăх

Ытларикун Шупашкарти М.Горький проспектĕнче ятарлă çар операцине хутшăнакансен ячĕпе йывăçсем лартрĕç.

Пулас çăка аллейине хывма тĕп хула пуçлăхĕ Владимир Доброхотов, Шупашкарăн хисеплĕ гражданинĕ Наталия Партасова, Шупашкарти Мускав районĕн управин ертӳçи Елена Романова, Патшалăх Канашĕн, хула пухăвĕн депутачĕсем хутшăнчĕç. Экологипе çыхăннă мероприятире çавăн пекех Мускав районĕнчи хĕрарăмсен канашĕн, территори общество хăй тытăмлăхĕсен представителĕсем, волонтерсем, 5-мĕш гимназире вĕренекенсем, упраляющи компанисен ĕçченĕсем хастарлăх кăтартрĕç.

— Кăçал магистральлĕ урамсенче йывăç лартас тĕлĕшпе уйрăмах тимлĕ пулас терĕмĕр, ку — эпир хула пуласлăхне хывакан тӳпе. Эпир пурте хамăрăн хулана юрататпăр, ăна илемлĕ, тирпейлĕ тата симĕс тума тăрăшатпăр. Çакнашкал акцисене час-часах ирттерме палăртатпăр, — пухăннисене саламланă май пĕлтерчĕ Владимир Доброхотов.

Унтан вара пурте ĕçе пуçăнчĕç. Специалистсем мĕн кирлине малтанах хатĕрлесе хунă: йывăçсене ăçта лартмаллине палăртнă, шăтăксене те чавнă. Çăка хунавĕсене Тула облаçĕнчи подряд организацийĕнчен туяннă. Хулан тивĕçлĕ службин представителĕсем вĕсене хăйсем суйласа илнĕ — пурте ăнăçлă чĕрĕлччĕр тенĕ. Акă пулас çăка аллейи хатĕр те. Хула пуçлăхĕ «Зеленстрой» АО ĕçченĕсене йывăçсене лайăх пăхса тăмалли çинчен асăрхаттарчĕ.

«Йывăç лартни çамрăксене çут çанталăка, тавралăха упрамаллин пĕлтерĕшне ăнланма пулăшать. Хулана симĕслетмелли çакнашкал общество акцийĕсене хутшăнни ачасен, яшсемпе хĕрсен социаллă яваплăхне çирĕплетет, гражданла хастарлăха вăй парать. Вĕсем хăйсен ĕçĕ çĕршыв, планета пуласлăхне ырă витĕм кӳнине ăнланма пуçлаççĕ», — шухăшне пĕлтерчĕ Дарья Шеблыкина волонтер.

www.hypar.ru