Пĕр кунра 8 пушар сÿнтернĕ

Утă уйăхĕн 27-мĕшĕнче пушар хуралĕн ĕçченĕсем каллех çынсене çулăмран хăтарма васканă.

Канаш хулинчи Машина тăвакансен урамĕнчи пĕр килте чĕлĕм туртнине пула пушар тухнă. Урайĕ çунса кĕлленнĕ, стенасемпе мачча та сиенленнĕ. Ку инкек 70 пин тенкĕлĕх тăкак тӳстернĕ. Шупашкарти Ленин районĕнчи Станци çумĕнчи урамра «Парк Отель Усадьба» организацин ĕç пӳлĕмĕнче çулăм алхаснă. Сăлтавĕ — электрохатĕрпе тĕрĕс усă курманнинче. Çĕмĕрле хулинчи пĕр çуртра пушар тухнă. Вăл кĕпе-йĕм çумали машинăна, стенасене, сĕтел-пукана тĕп тунă. Патăрьел районĕнчи Ыхраçырми ялĕнчи пĕр килте çулăм тухсан газ котелĕ тата кухня пĕтнĕ. Вăрнар поселокĕнчи Пушкин урамĕнче мунча çуннă. Улатăр хулинчи Кутузов урамĕнче пушар тухсан сарай сиенленнĕ. Шупашкарти Граждан урамĕнчи пĕр çуртра картлашкасен тĕлĕнчи çӳп-çап çуннă. Трактор тăвакансен проспектĕнче вара çулăма пула балкон сиенленнĕ, 33 çулти арçын хур курнă. Палăртмалла: çулталăк пуçланнăранпа республикăра 869 пушар тухнă, вĕсенче 50 çын суранланнă, 39 çыннăн пурнăçĕ татăлнă.

www.hypar.ru