Медицинăна кадрсемпе тивĕçтерес ыйтăва хускатнă

Ĕç тăвакан влаç органĕсен тата муниципалитетсен ертÿçисемпе тунтикунсерен ирттерекен канашлура  сывлăх сыхлавĕн министрĕ Владимир Степанов хăй ертсе пыракан отрасле кадрсемпе тивĕçтерес ыйтупа сăмах илчĕ.

Республикăра паян 5661 врач ĕçлет, медсестрасен персоналĕ — 12,3 пин çынна яхăн. «Земство» тухтăрĕ» тата «Земство фельдшерĕ» программăсем ялсенчи медиксен çителĕксĕрлĕхĕпе çыхăннă çивĕчлĕхе чакарма май параççĕ.

Анчах чăрмав тухса тăнă иккен — федераци шайĕнчи йышăнупа миллион тенкĕпе танлашкан тÿлеве ялсенчи медицинăн пуçламăш сыпăкне каякан врачсене кăна пама палăртнă, ансăр специалистсем хавхалантармалли йышран тухса ÿкнĕ. Çавна май шурă халатлисем асăннă программăсемпе килĕшÿллĕн кăçал парасса кĕтнĕ тÿлевсен 41% кăна илнĕ. Министр ку енĕпе çитес çул тивĕçлĕ тÿрлетÿ пуласса шанать, анчах шанăç тÿрре тухĕ-и — калама хĕн. Ку хыпар Чăваш Ен Пуçлăхĕшĕн Олег Николаевшăн та кĕтменлĕх пулчĕ ахăр: «Мĕн тума пултаратпăр — тишкермелле…» — терĕ вăл.

www.hypar.ru

Николай КОНОВАЛОВ.