Чăваш Ен - Раççейре 3-мĕш

17 Июн, 2014

Чăваш Енĕн «Уçă кăтартусем» порталĕ регионри уçă кăтартусен рейтингĕнче Раççейре - 3-мĕш, федерацин Атăлçи округĕнче вара 1-мĕш вырăнсене йышăннă. Интернет-ресурс Раççей саккунĕсене, экспертсен тата унпа усă куракансен ыйтăвĕсене 92,6% тивĕçтерет.

Рейтинг лидерĕ - Тула облаçĕ /100%/. Иккĕмĕш вырăнта - Волгоград облаçĕ /96,2%/. Информаци ирĕклĕхĕн фончĕн аудичĕн пĕтĕмлетĕвĕсем çапларах. Уçă кăтартусен порталĕсене «Уçă правительство» пулăшнипе 2014 çулхи ака-çу уйăхĕсенче тĕрĕсленĕ. Регионсене 74 параметрпа хакланă, вĕсенчен ытларахăшĕ уçă кăтартусен пуххисене вырнаçтарма кирлĕ самантсемпе тата ыйтнине пурнăçа кĕртнин пахалăхĕпе çыхăннă.

Чăваш Ен çĕр-шыври уçă кăтартусен пĕтĕм пуххине пичетленĕ 6 регион йышне кĕнĕ, çавăн пекех - кирлĕ пĕтĕм тема тăрăх кăтартусем вырнаçтарнă 4 регион шутне. Унсăр пуçне Чăваш Ен порталĕ пуххисене миçе хут «уçласа илнине» пăхма май панă, хире-хирĕçле çыхăну йĕркеленĕ, файлсен тĕрĕс адресĕсене тата ыттине кăтартнă ресурссен йышне те /ун пекки нумаях мар/ лекнĕ.

Паянхи кун Чăваш Енĕн «Уçă кăтартусем» порталĕнче кăтартусен 116 пуххипе паллашма пулать. Ку вăл - республика пурнăçĕн тĕрлĕ сфери пирки калакан информаци: сывлăх сыхлавĕ, вĕрентÿ, экономика, ЖКХ, ĕç, экологи т.ыт.те /пĕтĕмпе 17 категори/. Тĕслĕхрен, ЧР Вĕренÿ министерстви ача сачĕсемпе шкулсем, ЧР Сывлăх сыхлавĕн министерстви больницăсемпе аптекăсем, ЧР Культура министерстви театрсемпе музейсем çинчен кăтартусем вырнаçтарнă.

Ресурса Чăваш Енĕн Геопорталĕпе çыхăнтарнă. Çапла вара унпа усă куракан пĕр-пĕр учреждени адресне, телефон номерĕпе ĕç режимне пĕлме çеç мар, вăл ăçта вырнаçнине карттă çинче пăхма та пултарать.

Аса илтеретпĕр: уçă кăтартусемпе /вĕсене патшалăх влаçĕн тата вырăнти хăй тытăмлăх органĕсем тăратаççĕ/ кирек кам та усă курма пултарать, çав шутра коммерци тата урăх тĕллевсемпе те, ЭВМ программисем хатĕрлемешкĕн т.ыт.те. Чăваш Енре «Уçă кăтартусем» портала тăвас ĕçе РФ Президенчĕн 2012 çулхи çу уйăхĕн 7-мĕшĕнчи «Патшалăх управленийĕн тытăмне лайăхлатмалли тĕп çул-йĕр çинчен» 601 /-лĕ указне пурнăçлас тесе пуçăннă. Портал 2013 çул вĕçĕнче хута кайнă. Шăпах çак вăхăт тĕлне Чăваш Енĕн ĕç тăвакан влаç тата вырăнти хăй тытăмлăх органĕсем асăннă ресурс уйрăмĕсене тултарас-пуянлатас ĕçе вĕçленĕ. Унтанпа Чăваш Енĕн «Уçă кăтартусем» порталне 27,5 пин хут кĕрсе пăхнă, кăтартусен пуххисене 559 хут «уçласа илнĕ».

Ирина НИКОЛАЕВА.

Комментировать

CAPTCHA на основе изображений
Введите символы, которые показаны на картинке.