«Хресчен пулма чунпа пиçсе çитмелле»

Канаш районĕнчи Маяк ялĕнче пурăнакан Александр Владимиров фермер тăлăх ÿснĕ, хура-шур нумай тÿснĕ.

— Аттене курман эпĕ. Пĕчĕк­рен арçын ĕçне хăнăхса пытăм. Ялта лаша пулман. Сухапуç туртса çĕрулми лартнă. Пĕррехинче ăна хамах ăсталарăм, — тет Александр Петрович.

Арçын ача шкулта тăрăшулăхпа палăрнă. Трактор çÿретме вĕрентекен предмета пуринчен те ытларах килĕштернĕ.

— Питĕ тракторист пулас килетчĕ. Вăл вăхăтра механизатора ялĕпех хисепленĕ. Çемьене çăкăр çитернĕ вăл, ачисене выçă лартман, — сăмахлать А.Владимиров. — Икĕ класри арçын ачасенчен тăваттăн çеç удостоверени илтĕмĕр. Тăван колхоза ĕçе вырнаçрăм. Тырă вырнă, çĕр сухаланă, пăчкă кĕрпи турттарнă — ăçта хушнă, çавăнта кайнă.

Тÿрех лайăх техника паман-ха ăна. Карта çумĕнчи ДТ-75 тракторпа ĕçлеме тытăнсан, чунĕпе чăн-чăн механизатор пулнине ертÿçĕсене ĕнентерсен малтан Беларусь-50, унтан Беларусь-52 шаннă. Пурăна-киле çемье çавăрса хăтлă çурт лартнă, ывăлпа икĕ хĕр çитĕнтернĕ. Хĕрĕсем Чăваш патшалăх ял хуçалăх академине пĕтернĕ: пĕри — агроном, тепри — экономист. Хăй, мăшăрĕ, ачисем тата кинĕ — çирĕм çул каялла йĕркеленĕ хресчен-фермер хуçалăхĕнче вăй хураççĕ. Темиçе çулта çĕр лаптăкне 330 гектара çитернĕ. Унта кĕрхи тата çурхи тырă, нумай çул ÿсекен курăк, çĕрулми туса илеççĕ.

Техника паркĕ пуянланать. Анчах татах çĕнĕрен туянас — хакĕ хытă çыртать. Александр Петрович ывăлĕпе Михаилпа Кулибин çулĕ çине тăнă — виçĕ уйăхра хăйсемех лайăх ĕçлекен трактор пуçтарнă. Сарлака урапаллăскер пылчăкра путмасть. Калчана апатлантарма, сÿреме меллĕ. Ăна пĕр çулхине район Акатуйне илсе тухнă. Куракансем пысăк хак панă.

— Кĕрĕвĕрсем хăвăрпа пĕр­ле вăй хурасшăн-и?

— Хăйсен ĕçĕ лайăх та — шарламаççĕ. Хресчен пулма чунпа пиçсе çитмелле, тăван çĕре чĕререн юратмалла. Хальлĕхе хатĕрех мар-ха. Анчах кăмăлĕ пулсан пĕрле тăрăшма хаваспах йышăнатпăр. Кирлĕ чухне турткаланса тăмаççĕ, ыйтсан яланах пулăшаççĕ.

Владимировсем ĕç династине тăван çĕрпе çыхăнтарнă. Çулне шутласан самаях пухăнать.