Пĕчĕк тухăç сăлтавĕ

Вăрлăх йĕркеллĕ шăтманни, тухăç япăх пулни кăмăла хуçать. Нумайăшĕ çакна пахалăхсăр вăрлăхпа çыхăнтарать. Сăлтавĕ мĕнре?

1. Тăпра акма хатĕр мар. Вăл пур çĕрте те пĕр пек пиçсе çитеймест. Ăна çапла пĕлмелле: тăпрана ывăçласа илмелле те хыттăн чăмăртамалла, унтан çĕре пăрахмалла. Енчен муклашка салансан - çĕре чавма, акма-лартма вăхăт.
2. Хăшĕ-пĕри тĕрлĕ культурăна пĕр пек тарăнăша акать. Мĕнле лартасси вăрлăх виçинчен, çĕртен, нÿрĕклĕхрен килет. Вăрлăха çăмăл, хăвăрт типекен тăпрана тарăнрах лартмалла. Тăмлă, йывăр тăпрана - ăшăх.
3. Вăрлăх кая юлса шăтни. Пĕрчĕлеменнине кăна çăра акмалла. Малтан вĕсем пĕр-пĕрне чăрмантармаççĕ, анчах каярахпа ÿсен-тăран çутăшăн, нÿрĕкшĕн кĕрешме тытăнать. Çавăнпа калчан пĕрремĕш-иккĕмĕш çулçи вăй илсен сайралатмалла. Вăхăтра çакна тумасан тухăçлăх чакать.
4. Калчана йăран çине куçарма васкамалла мар. Çуркуннехи çанталăк вылявлă. Ĕлĕкрех палан чечеке лармасăр калчана йăран çине куçарма сĕнмен. Ун хыççăн çанталăк текех сивĕтмест-мĕн. Вăл кунĕпех улшăнса тăни те калчашăн сиенлĕ. Хĕвел ăшăтсан тÿрех ăна йăран çине куçарма тăхтăр.