Ветеринарсем хăйсен ĕçне пурнăçлаççĕ

• Сулахайран, пĕрремĕш ретре: Г.Евдокимова тĕп ветврач /«Новый путь» ЯХПК/, С.Яковлева ветврач, О.Андреева тĕп бухгалтер, пуçлăх заместителĕ Л.Львова, ЧР патшалăх ветеринари службин ертÿçи С.Скворцов, учреждени пуçлăхĕ В.Афанасьев, И.Никифоров заведующи /Вырăс Сурăм/, В.Яковлева ветврач, Л.Павлова фельдшер /Вырăс Сурăм/; иккĕмĕш ретре: Л.Тарасова заведующи /Мăн Этмен/, Л.Шленская фельдшер /Ураскилт/, ветаптека заведующийĕ О.Павлова /Элĕк/, Л.Ивановская заведующи /Элĕк/, Ф.Андреева фельдшер /Ехремкасси/, Э.Ефимова заведующи /Юнтапа/, Г.Афанасьева фельдшер /Кĕçĕн Тăван/, Л.Андреев водитель, Л.Калмыкова заведующи /Ураскилт/, А.Павлова заведующи /Крымсарайккă/, М.Ефимова фельдшер /Мăн Этмен/; виççĕмĕш ретре: Л.Ананьева бухгалтер, Г.Павлов фельдшер /Крымсарайккă/, И.Кириллова ветсанитар, В.Осипова фельдшер /Элĕк/, С.Никонова фельдшер /Юнтапа/, Т.Гордеева заведующи /Чăваш Сурăм/, В.Николаев ветврач, В.Афанасьев водитель, К.Васильев заведующи /Ехремкасси/.

Элĕк районĕнчи чĕрчун чирĕсемпе кĕрешекен станци коллективĕ килти хуçалăхсенчен пухакан сĕт пахалăхне тĕрĕслессишĕн нумай ĕç тăвать.

- Паянхи куна продукцирен 1150 тĕслĕх илсе тишкертĕмĕр, - пĕлтерчĕ учреждени пуçлăхĕн заместителĕ Лариса Львова. - Вĕсен 16,5: ĕне усракансем сĕте шыв хушнине çирĕплетрĕ. Чĕртавара начарлатакансем март уйăхĕнче 19: йышăнатчĕç. Çынсенчен пахалăхшăн ыйтма тытăнсан витрене шыв чăмтаракансем сахалланчĕç.

Ветстанцин 10 уйрăмĕн специалисчĕсем кашни уйăхра тĕслĕх икĕ хут илеççĕ. Вĕсене ветлабораторие графикпа килĕшÿллĕн илсе килеççĕ. Специалистсем «Клевер-2» аппаратпа тĕпчеççĕ. Ку ĕçе Вера Яковлева ветврач йĕркелет.

- Сĕтĕн çупа белок шайĕ, çăралăхĕн тата çусăр типĕ сĕт юлашкин /СОМО/ хисепĕ норматива тивĕçтерет, - терĕ Лариса Николаевна. - Килти хуçалăхсенчен ытларахăшĕн çу хисепĕ Министрсен Кабинечĕ йышăннă никĕсрен /3,4:/ пысăкрах.

Апла пулин те продукци пуçтаракансем сĕт сутакансене çу хисепне кура тÿлеме пуçламан-ха. Вĕсем килти хуçалăхсемпе продукци туянасси пирки 645 килĕшÿ тунă. «Хушса тÿлемесен ăна çирĕплетни пире мĕн тума кирлĕ?» - ыйтаççĕ ĕне тытакансем.

Çапла пĕтĕмлетес килет: ветеринарсем килти хуçалăхсенчен пухакан сĕт пахалăхне вăхăтра палăртаççĕ. Продукци пуçтаракан тытăмсем унăн çу хисепне тĕпе хурса тÿлемеççĕ.

Юрий МИХАЙЛОВ.

Автор сăнÿкерчĕкĕ