Комментировать

Мана арлăх парĕн аденоми аптăратать. Эмел ĕçетĕп, анчах пулăшмасть. Çак чиртен халăх медицини мĕн сĕнет-ши?

Алексей Смирнов. Куславкка районĕ.

Ку чиртен сипленме сире хăш-пĕр мелпе паллаштаратпăр:

Арлăх парĕн аденоминчен кавăн пулăшать. Ытларах сĕткенĕ. Ăна кашни кун пĕрер стакан 2-3 эрне ĕçмелле. Сĕткене 1 апат кашăкĕ пыл хушмалла. Аденома чирĕнчен кавăн вăрри те лайăх. Ăна типĕтмелле, ăшалама кирлĕ мар. Талăкра 100-120 гр пĕр уйăх хушши çимелле. Вĕтетнĕ вăрра апата хушма юрать.

Пуçлă суханпа сипленсен те аван. Кашни кун çывăрма выртас умĕн пысăках мар пĕр сухан çимелле е унăн шывне 50 гр ĕçмелле. Ăна çапла хатĕрлемелле: вăтам икĕ сухана вĕтетмелле, тин вĕренĕ 0,6 л шыва ямалла, хупламалла, 2 сехет тытмалла. Эмеле сухан хуппинчен те хатĕрлеме пулать: 1 стакан сухан хуппине çумалла, дуршлаг витĕр кăлармалла, 0,5 л шыва ямалла. Вăйсăр çулăм çинче 7 минут вĕретнĕ хыççăн 40 минут тытмалла, 3 апат кашăкĕ пыл хушса пăтратмалла, 5 кун çуршар стакан кунне виçĕ хутчен ĕçмелле. 7 кун тăхтанă хыççăн сиплев курсне малалла тăсмалла.

Кун пек чухне ыхра та пулăшать. Вĕтетнĕ 200 гр ыхрана вăтам 12 лимон сĕткенĕпе хутăштармалла, 24 кун тытмалла. 1 чей кашăкĕ хатĕр эмеле çур стакан шывпа хушмалла, кунне пĕр хутчен 1 чей кашăкĕ виçĕ эрне ĕçмелле. 7 кун тăхтанă хыççăн сиплев курсне малалла тăсмалла.

Шĕпĕн курăкĕ те усă кÿрет. 1 апат кашăкĕ вĕтетнĕ шĕпĕн курăкне вĕрекен 1 стакан шыва ямалла, 2 сехет тытмалла, сăрăхтармалла. Сиплĕ шыва кашни кун виçĕ хутчен апат умĕн çур сехет маларах пĕрер апат кашăкĕ ĕçмелле. Виçене çирĕп пăхăнмалла.