Комментировать

Шăнса чирлесен ăшă тăхăнмалла, нумай ĕçмелле. Хăвăртрах сывалма мĕн ĕçсен лайăхрах?

Ăшă чей лимонпа, пылпа. Шăнса чирленине туйсанах ăшă чей лимонпа тата пылпа ĕçмелле. Çăрах мар симĕс е хура чей пăшăхламалла, темиçе касăк лимон, 1 кашăк пыл хушмалла. Вĕсене ăшă шĕвеке ямалла, унсăрăн лимонпа пылăн усăллă паха енĕсем çухалаççĕ.

Шăлан чейĕ. Шăланра С витамин нумай. Типĕтнĕ çырлана вĕтетмелле, çĕрле термоса 3 апат кашăкĕ çырла, вĕренĕ çур литр шыв ямалла. Ирхине шăлан чейне сăрăхтармалла, кунне 3-4 хут апатчен 20 минут маларах çуршар стакан ĕçмелле.

Хăмла çырлипе çăка чечекĕн чейĕ. Сиплĕ ĕçме хатĕрлеме ансат. Çăкан типĕтнĕ чечекĕнчен чей хатĕрлемелле, унта хăмла çырлин типĕтнĕ çулçипе çырлине е варенине хушмалла. Çур сехетрен ĕçмелле.

Кĕтмел е шур çырли морсĕ. Кĕтмел е шур çырли бактерисене пĕтерме, организма чирпе кĕрешме пулăшаççĕ. Морс хатĕрлемешкĕн çырлана сахăр песукĕпе /3,1 виçепе илмелле/ пăтратмалла. Темиçе кашăк хутăша çур литр ăшă шыва ямалла.

Глинтвейн. Çак ĕçме организма ăшăтать, сивĕ кунсенче кирлех вăл. Шăнса чирлесен пулăшать, кăмăл-туйăма çĕклет. 100 миллилитр шыв тата техĕмлĕхсем /пăрăç, тикĕт курăкĕ /гвоздика/, корица/ кирлĕ. Техĕмлĕхсене пăтратмалла, шыв хушмалла, çулăм çинче вĕреме кĕриччен тытмалла. 10 минутран сăрăхтармалла. Апельсин касăкĕ, сахăр хушса пăтратмалла. Иçĕм, панулми хушма юрать. Глинтвейна вĕрилле ĕçмелле.