Комментировать

2024 çул Шупашкар хулишĕн юбилейсемпе пуян. Тĕп хулари предприятисемпе организацисем, учрежденисем çавра датисене палăртаççĕ.

Афганистанра пуç хунă Олег Беспалов десантник-салтак ячĕллĕ 7-мĕш вăтам шкул 85 çулхи юбилейне уявланă. Унта çак пĕлÿ çуртĕнчен вĕренсе тухнисене, вĕрентекенсене, вĕренекенсене, ĕçтешсене, Чапаев поселокĕнче пурăнакансене чĕннĕ.

Уяв каçне шкул ачисем «МЫ» патриот юррипе уçнă. Пухăннисене Чăваш Республикин Патшалăх Канашĕн депутачĕсем Михаил Резников, Роман Алексеев, вĕрентÿ министрĕн пĕрремĕш çумĕ Антонина Буданцова, Шупашкар хула администрацийĕн Мускав районĕн управин пуçлăхĕн çумĕ Наталия Яхатина, хула администрацийĕн вĕрентÿ управленийĕн пуçлăхĕ Алексей Лукшин, Раççей вĕрентÿ тата наука ĕçченĕсен профсоюзĕн Шупашкарти организацийĕн председателĕ Зоя Ильина саламланă.

Ĕçре чунне парса вăй хуракансене, хастарлăхпа палăрнă учительсене, шкул директорне Лариса Мудраковăна Чăваш Республикин Патшалăх Канашĕн, Вĕрентÿ министерствин, Шупашкар хула администрацийĕн, тĕп хулан вĕрентÿ управленийĕн Тав çырăвĕсемпе, Шупашкар хули 555 çул тултарнă ятпа хатĕрленĕ медальпе чысланă.

Вĕрентекенсемпе вĕренкенсем уяв тĕлне савăнăçлă программа хатĕрленĕ. Хăнасем сăн ÿкерчĕксен хроникипе, шкул пурнăçне сăнлакан видеороликсемпе паллашнă. Педагогика ĕçĕн ветеранĕсем валли шкулта ятарлă экскурси йĕркеленĕ. Сăмах май, асăннă шкула нумаях пулмасть юсаса çĕнетнĕ. Ку шкул Чапев поселокĕнче В.И.Чапаев ячĕллĕ завода хута янă хыççăн уçăлнă. Ун хыççăн пурăнмалли çуртсене, культура çурчĕсене, спорт тата сывлăх учрежденийĕсене хута янă. Вăхăт пĕр вырăнта тăмасть. Цифра технологийĕсем аталанаççĕ. Шкул хăйĕн истрийĕпе вăйлă. Халĕ коллектив, шкул ачисем тата вĕсен ашшĕ-амăшĕ пĕрле туслă ĕçленипе çитĕнÿсем тăваççĕ.

www.hypar.ru