Комментировать

Олимп вăййисен тĕнчипе паллă чемпионĕ В.Н.Ярды ячĕллĕ спорт керменĕнче чĕрĕк ĕмĕр каяллах спортăн тĕрлĕ енĕпе Раççей чемпионачĕсем тата Пĕтĕм тĕнчери ăмăртусем йĕркелеме пуçларĕç. Юпа уйăхĕн 12-13-мĕшĕсенче кунта кире пуканĕ йăтассипе «Хыпар» хаçат парнисене çĕнсе илессишĕн йăлана кĕнĕ Пĕтĕм Раççейри турнир иртĕ.

Пысăк пĕлтерĕшлĕ пулăмччен авăн вĕçĕнче тимĕр вăййине юратакансем хăш-пĕр хулапа округра мала тухассишĕн тупăшрĕç. Елчĕкри Ардалион Игнатьев ячĕллĕ спорт шкулĕнче кунта вĕреннĕ Раççей Геройне Николай Петрова асăнса ирттернĕ турнира 120 яхăн атлет хутшăнчĕ. Ăмăртусем пуçланас умĕн вĕсене парадра Елчĕк округĕн администрацийĕн пуçлăхĕ Леонард Левый, Днепр юхан шывĕ хĕрринче неофашистсемпе çапăçса паттăрла пуç хунă Геройăн ашшĕ саппасри подполковник Алексей Петров тата сумлă ытти ентеш ăшшăн саламларĕç. Ăмăртусене йĕркелесе ирттерме Чăваш наци конгресĕн вырăнти уйрăмĕн ертӳçи Николай Малышкин, «Хыпар» хаçат парнисене темиçе хут çĕнсе илнĕ Раççей спорт мастерĕсем Анатолий Горшков, Александр Константинов тата Василий Кириллов пулăшрĕç. Хальхи турнирта пĕрремĕш вырăнсене округри тĕрлĕ шкулта вĕренекен Софья Соловьева, Анжела Уткина, Алена Николаева, Наталья Мартынова, Илья Московский, Алексей Скворцов, Егор Смирнов, Тарас Пупин, Павел Алексеев йышăнчĕç. 

www.hypar.ru