Комментировать

Вăтам классенче вĕренекенсем валли хатĕрленĕ кĕнекене «Саккăрмĕшсем» шкул повеçĕ тата халапсемпе калавсем кĕнĕ.

Повеçре хальхи вăхăтри хула шкулĕнче вĕренекен 8-мĕш «а» класс пурнăçĕ туллин тухса тăрать. Вĕсем тĕрлĕ пăтăрмаха тăтăшах лекеççĕ. Хайлаври кашни сăнарăн хăйĕн пăшăрханăвĕ-сĕмленĕвĕ. Çулталăк тăршшĕпе саккăрмĕшсем Вĕрентекенсен кунне те, Февралĕн 23-мĕшĕпе Мартăн 8-мĕшне те паллă тăваççĕ, спорт ăмăртăвĕсене те хутшăнаççĕ, Пушкин картти мĕнне те пĕлекен пулаççĕ. Калавсемпе халапсенче автор тăван тавралăха, тăват ураллă туссене юратмалли çинчен асăрхаттарать.

Канаш районĕнчи Мăкăр ялĕнчи юлашки вăхăтра палăрнă кивĕ чукун çул кĕперĕн сăнарĕ хайлавсенче пысăк вырăн йышăнать. Ку культура палăкне кĕнеке хуплашкинче те курма пултаратпăр. 

СПРАВКА:

Ольга Васильева (Федорова) Чăваш кĕнеке издательствинче ача-пăча литературин редакторĕнче ĕçлет. Вăл – Раççей Федерацийĕн Журналистсен союзĕн, ЧР Профессионал писательсен союзĕн членĕ. Унăн ятне Ача-пăча литературин пĕтĕм тĕнчери IBBY Хисеплĕ списокне кĕртнĕ. Прозаик Мускавра иртнĕ Пĕтĕм тĕнчери 37-мĕш IBBY Конгреса хутшăннă (2021).

www.hypar.ru Ольга Ивановăн сăн ÿкерчĕкĕсем