Комментировать

Патшалăхăн ял территорийĕсене комплекслă майпа аталантармалли программине кĕртме сĕннĕ улшăнусемпе Министрсен Кабинечĕн юнкунхи ларавĕнче ял хуçалăх министрĕ Сергей Артамонов паллаштарчĕ.

Кăçал çак программăна пурнăçлама 1,3 миллиард тенкĕ уйăрĕç: ял çыннисен пурăнмалли условийĕсене лайăхлатма, ипотека процентне чакарма, инфратытăм йĕркелеме, ытти тĕллев валли. Комплекслă строительство адресĕсен шутĕнче — Комсомольски районĕнчи Чĕчкен, Шупашкар районĕнчи Тутаркасси, Канаш районĕнчи Вырăскас Пикших, ытти ял.

Кăçал çынсем пуçару тунипе палăртнă 862 проекта пурнăçлама тĕллев тытнă. Çав шутра автоçулсен 347 сыпăкне, коммуналлă хуçалăхăн 150 объектне, ачасен пилĕк теçетке вăйă площадкине юсамалла, 47 кану вырăнне хăтлăлатмалла, 35 пĕвепе кӳлле тасатмалла, ытти ĕç пурнăçламалла.

Ял теми çакăнпа та вĕçленмерĕ-ха. Правительство аграрисене пулăшмалли «Агростартап» грант валли уйăракан укçа виçине пысăклатассине ырларĕ. Вăл республикăра чи анлă усă куракан грантсенчен пĕри шутланать. Пĕлтĕр ăна илме 81 заявка панă, 14 грант уйăрнă — 51 миллиона яхăн тенкĕлĕх. Çавна май 2022 çул валли уйăрма маларах палăртнă 60,8 миллион тенке икĕ хут пысăклатма йышăнчĕç — тата 60 миллион тенкĕ хушăнать. Çак укçа ултă теçетке грант проектне пурнăçлама çитĕ. Грант илнисем 60-тан кая мар ĕç вырăнĕ йĕркелĕç, проектсемпе çыхăннă производствăсем ĕçлесе кайни бюджетшăн çулталăкра 8-9 миллион тенкĕпе танлашакан налуксемпе çаврăнса килĕ.

Ял хуçалăхне пулăшассипе çыхăннă çĕнĕлĕхсем татах пур. Министрсен Кабинечĕн унччен тунă йышăнăвне улшăнусем кĕртессине ырланă май субсиди памалли правилăсем çĕнелеççĕ. Çав шутра çемье фермисене аталантармалли грант пысăкланать: мăйракаллă шултра выльăх ферми пулсан — 10 миллионран 15 миллион тенкĕ таран ӳсет, ытти выльăх пулсан — 5 миллионран 7 миллион тенкĕ таран. Палăртни вырăнлă: 2021 çулта çемье фермисене 107 миллион ытла тенкĕлĕх 15 грант панă.

www.hypar.ru