Комментировать

Чӑвашлӑха чунтан юратакансем паян, пушӑн 30-мӗшӗнче, каҫхине Ҫеҫпӗл Мишши ячӗллӗ Чӑваш патшалӑх ҫамрӑксен театрне пуҫтарӑнчӗҫ. ЧНК йӗркелесе янипе, ЧР культура министерстви пулӑшнипе эстрада юррисен Пӗтӗм Раҫҫейри "Кӗмӗл сасӑ" конкурс-фестивалӗ 20-мӗш хут иртрӗ.

Мероприятие чӑваш чӗлхине, культурине малалла аталантарас тӗллевпе йӗркеленӗ. Гала-концерта Чӗмпӗр, Оренбург облаҫӗсенчи, Сургут, Питӗр хулисенчи, Тутарстанри тата Чӑваш Енри яш-хӗр хутшӑнчӗ. Тупӑшу хӗрӳ иртрӗ. Жюрие чи пултаруллине палӑртма ҫӑмӑл пулмарӗ.

Наташа ВАСИЛЬЕВА:

- Питӗртен килсе ҫитрӗм. Пӗлтӗр 2-мӗш вырӑн йышӑннӑччӗ. Чӑвашсене юрататӑп. Ҫавӑнпа чӑвашла юрлатӑп. Эстрадӑна кӑна мар, халӑх юррине аталантарас килет. Ҫавӑнпа "Шыв юхать" юрра суйларӑм. Каллех 2-мӗш вырӑн йышӑнтӑм. Ҫитӗнӳ малалла ӗҫлеме хавхалантарать. "Кӗмӗл сасӑ" ҫӗнтерӳҫи Шупашкарти Федор Павлов ячӗллӗ музыка училищинче вӗренекен Ксения Захарова пулса тӑчӗ. Гитара каласа "Телей" юрӑпа тухрӗ вӑл сцена çине.

Ксения ЗАХАРОВА:

- Эпӗ Тутарстанри Ҫӗпрел районӗнче ҫуралса ӳснӗ. 2 е 3-мӗш вырӑн йышӑнас хавхаланупа хутшӑнтӑм. Мӗншӗн тесен пӗрремӗш хут. Ҫӗнтерӳҫӗ пулса тӑни маншӑн - телей. Пике парнесене - ноутбукпа гитарӑна - тивӗҫрӗ.

Валерий КЛЕМЕНТЬЕВ, жюри председателӗ:

- Ҫамрӑксенче пирӗн пуласлӑх. Тӗрлӗ регионтан хутшӑнни савӑнтарать. Пӗр-пӗринпе паллашса, пӗрле ӗҫлесе чӑвашлӑха аталантарасси - сирӗнте. Ҫӗнӗ ятсем хӑйсен вырӑнне тупасса, илемлӗ сассипе халӑха савӑнтарасса шанатӑп.

www.hypar.ru