Комментировать

Манăн «Совет Çарĕн отличникĕ» паллă пур. Çавна май «Ĕç ветеранĕ» ята илме пултаратăп-и?

М.СМИРНОВ, Вăрнар районĕ.

Чăваш Республикинчи Ĕç тата социаллă хÿтлĕх министерствинчен пĕлтернĕ тăрăх — федерацин «Ветерансем çинчен» саккунпа килĕшÿллĕн 2016 çулхи утă уйăхĕн 1-мĕшĕнчен «Ĕç ветеранĕ» удостоверени пуррисене; СССР е Раççей Федерацийĕн медалĕсемпе орденĕсене, хисеплĕ ячĕсене тивĕçнисене; РФ Президенчĕн Хисеп хучĕпе е Тавĕпе чысланисене; ĕçри /службăри/ тава тивĕçлĕ ĕçсемшĕн тата вăл е ку сферăра /экономика отраслĕнче/ 15 çултан кая мар тăрăшнăшăн ведомствăн уйрăмлăх паллисене тивĕçнисене тата пенси çирĕплетмелĕх стаж /арçынсен — 25 çултан, хĕрарăмсен — 20 çултан кая мар/ пуррисене; Тăван çĕршывăн Аслă вăрçи çулĕсенче ачаллах ĕçлеме пуçланисене /арçынсен ĕç стажĕ — 40 çултан кая мар, хĕрарăмсен 35 çултан кая мар пулсан/ ĕç ветеранĕсен шутне кĕртеççĕ.

Федерацин ĕç тăвакан влаç органĕсем /вĕсен ĕç- хĕлне РФ Правительстви йĕркелесе пырать/ «Ĕç ветеранĕ» ята илме ирĕк паракан ведомствăн уйрăмлăх паллисене çирĕплетесси çинчен калакан положенипе килĕшÿллĕн хăш паллăпа хисеплĕ ят парассине хăйсем палăртаççĕ. Çавăн пекех 2016 çулхи çĕртме уйăхĕн 30-мĕшĕ тĕлне тава тивĕçлĕ ĕçшĕн уйрăмлăх паллисене тивĕçнисене СССР, РСФСР, Раççей Федерацийĕн патшалăх влаç органĕсен ведомство паллисен ЧР Министрсен Кабинечĕ 2005 çулхи авăн уйăхĕн 16-мĕшĕнче çирĕплетнĕ йышăнăвне тĕпе хунă списокпа тата йĕркепе килĕшÿллĕн «Ĕç ветеранĕ» ята параççĕ.

«Совет Çарĕн отличникĕ» паллă патшалăх е СССР, РСФСР, Раççей Федерацийĕн патшалăх влаç органĕсен ведомство награди шутланмасть. Çавна май вăл «Ĕç ветеранĕ» ята памалли сăлтав пулма пултараймасть.