Комментировать

20 Окт, 2017

Савăнăç та пулчĕ, куççуль те: паян "Хыпар" хаçат парнисемшĕн кире пуканĕ йăтрĕç

Чăн та, темле самант та пулчĕ: савăнăçĕ те, куççулĕ те. Анчах алăра кире пуканĕ тытнă чух мар. Кайран. Çын курман чух. Ăнăçу патне ăнтăлма хăнăхнă маттур черчен пикесемпе яштака яшсем, хăватлăн курăнакан арсемпе арăмсем пăхаттирле вăйне кăтартрĕç паян. Çапла, çулланнисем те пулчĕç турнирта. Çакăн пек иртрĕ кире пуканĕ йăтакансен "Хыпар" хаçат парнисемшĕн иртекен Пĕтĕм Раççейри ăмăртăвĕн пĕрремĕш кунĕ.

Аслăраххисем тенĕрен, турнирта, сăмахран, Канаш районĕнчи Мăкăр ялĕнче çуралнă, Канаш хулинче пурăнакан, хăй вăхăтĕнче унти педагогика училищинче вĕреннĕ, халĕ 5-мĕш шкулта ĕçлекен 49 çулти Алевтина Евграфова хăйĕнчен самай кĕçĕннисемпе харсăррăн ăмăртрĕ. 

Етĕрне районĕнчи Мăн Чурашри Людмила Вениаминова вун саккăр çеç тултарнă-ха. 16 килограмлă кире пуканне йăтакан, 63 килограмчченхи виçе категорийĕнчи хĕрсем хушшинче çавскер чи маттурри  пулчĕ - пукана 122 хут çĕклерĕ. Ал лаппи йăлт чĕрмеленсе-юнланса пĕтнĕ пулин те ыратнине туйманнине пĕлтерчĕ хĕр "Хыпар" издательство çуртне. 

Йĕпреç районĕнчи Пучинкери Михаил Петров тренер миçе ăстана туптаман-ши çак тарана çитсе! Ывăлĕ Владимир та хутшăнчĕ ăмăртăва. 24 килограмлă пукана ним мар çĕклекен Иван Майоров пĕлтĕрхи çак ăмăртуринчен ирттерчĕ - 114 хут çĕклерĕ. Кăçал Новосибирскра иртнĕ Пĕтĕм Раççейри ăмăртура 121 хут йăтнă каччă. Кашни спортсменшăн чунĕпе хыпса çунчĕ 7 спорт маçтăрне, çав шутран виççĕшĕ - тĕнче класлă, хатĕрленĕ маттур тренер. Вырсарникун вăл хăй те помоста тухĕ. 
 
Санкт-Петербургри хитре те çÿллĕ арçынсем те тĕлĕнтермеллипех тĕлĕнтерчĕç, хĕрĕсем те маттур пулчĕç. Турнира асăннă хулара пурăнакан Сергей Гаврилов тĕп судья пулса хаклассине эпир пĕлтернĕччĕ-ха. Аса илтерер: Сергей Александрович - кире пуканĕ йăтакансен Раççейри пĕрлештернĕ командин тĕп тренерĕ. Куславкка çĕрĕ çинче çуралса ÿснĕ çак маттур "Хыпар" турнирне кăçал та кăмăлтан хутшăнчĕ. 
 
Тĕрĕссипе, пĕрне ырласа теприне хурлама çук: пурте маттур, пурте талпăнуллă. Çĕнтерÿ патне ăнтăласси çултан та, регионтан та килмест. Çакна спортсменсем çирĕплетмеллипех çирĕплетрĕç. Мĕнех, ыранччен!
 

 

 
Рубрика: 
Теги: