Комментировать

Философ панулмие алла илчĕ, ăна çавăркаласа пăха-пăха тарăн шухăшлăн калаçма пуçларĕ:

- Çынсем хăйсен чĕрисем панулми евĕр тесе шухăшлаççĕ.

- Мĕнле майпа? - кăсăк-ланчĕ Вĕренекен.

- Тĕрĕсрех каласан, панулми çурри пек, - тÿрлетрĕ Философ. - Ак çапларах, - Вăл панулмие икке пайларĕ те сĕтел çине хучĕ.

- Кашни çыннăнах пур енĕпе те килĕшсе тăракан мăшăрĕ пуррине ĕненеççĕ вĕсем. Турă чунсене çĕр çине яриччен икке пайлать имĕш - хĕрача тата арçын ача. Панулми пек. Çапла вара çуршар чĕресем пĕр-пĕрне шыраса çÿреççĕ. Тупаяççĕ-и? Мĕнле куратăн эсĕ çакна? Кунашкал тĕлпулу пирки мĕн шухăшлатăн? Çĕр çинче мĕн чухлĕ çын, пĕлетĕн-и?

- Нумай.

- Çапла çав. Унсăр пуçне, ну тупĕç вĕсем пĕр-пĕрне. Малалла вара мĕн? Пĕр панулми пек пулса ăнланура пурăнĕç-ши?

- Çапла. Ун пек мар-и вара? - тĕлĕнчĕ Вĕренекен.

- Çук, ун пек мар.

Вĕрентекен аллисене çуршар панулми тытрĕ те куç умне çывхартрĕ.

- Акă икĕ çĕнĕ чун тĕнчене килет. Тĕнче вара этем чунĕсемпе мĕн тăвать?

Философ панулмин пĕр çуррине шатăртаттарса çыртса илчĕ.

- Тĕнче, - тулли çăварпа малалла калаçрĕ вăл, - чĕмсĕр мар. Хаяр та вăл. Пĕтĕмпех хăйне кирлĕ пек вĕтетме пултарать. Çырта-çырта илет е ачасене валли хатĕрленĕ нимĕр пек туса хурать. - Панулмин тепĕр çуррине те çыртса илчĕ.

Вĕренекен икĕ çыртăк çине пăхрĕ те вĕчĕрхенме пуçларĕ.

- Акă, - савăнăçлăн пĕлтерчĕ Философ, - вĕсем тĕл пулаççĕ!

Вăл çыртса илнĕ татăксене пĕрлештерчĕ.

- Вара мĕн, пĕр-пĕринпе килĕшсе тăраççĕ-и? Çук!!!

- Халĕ вара кунталла пăх, - терĕ те Вĕрентекен каллех темиçе панулми тытрĕ. - Кашнине икке пайлатпăр. Тĕрлĕрен панулмин çуррисене пĕрле хуратпăр та мĕн куратпăр?

- Вĕсем килĕшÿсĕр, - хуравлать Вĕренекен.

- Малалла пăх, - терĕ те Философ икĕ тĕрлĕ татăка пĕрле тытса икĕ енчен çыртрĕ. - Халĕ вара мĕн куратпăр? Вĕсенчен мăшăр пулаять-и?

- Çапла, - шухăшлăн пуçне сĕлтрĕ Вĕренекен. - Халĕ йĕркеллех.

- Мĕншĕн тесен тĕнче вĕсене пĕчченшер мар, пĕрле çыртса илнĕ!

Юратакан çынсем пĕр тулли пай пулса тăраççĕ те пурнăçăн кашни саманчĕпе пĕрле савăнаççĕ, шăпа ура хунине пĕрле тÿссе ирттереççĕ, пĕр-пĕрне çур сăмахранах ăнланма вĕренеççĕ, хавхалантараççĕ, ăнăçу патне тĕртеççĕ.

Вăхăт иртнĕ май вара хăш-пĕр мăшăр пĕр-пĕрин хăнăхăвне вĕренет, кăмăл-сипет тĕлĕшĕнчен пĕрешкел пулать.

Пирĕнпе пур енчен те килĕшекен чĕрен иккĕмĕш çурри тупăнасса кĕтсе пурăнмалла мар, хамăрăн çапла пулма тăрăшмалла. Ку вăл - питĕ чăкăлташ ĕç.