Кăрлач (январь) уйăхĕн паллисем

Кăрлач çулталăкшăн – пуç­ламăш, хĕлшĕн – варри.

Кăрлач - çулталăк хуçи, ун хыççăн ытти уйăхсем черетпе тăраççĕ.

Кăрлач уйăхĕ кашни çулах сивĕ пулмасть, енчен те иртнĕ çул вăл ăшă пулнă тăк, тепĕр çул хаяртарах пулать.

Кăрлачра тул хăвăрт çутăлсан – юр пуласса.

Кăрлачра сасă инçене ян каять – сивĕ хаярланать.

Вăрман шатăртатать – сивĕ нумай вăхăт тăрать.

Йывăçсене çемçе шурă пас тытать – тепĕр кун уяр çанталăк пулать.

Мăрьерен тухакан тĕтĕм çĕр çине анать – ăшăтасса, çÿлелле тÿп-тÿрĕ хăпарать – сивĕтессе.

Хĕвел «хăлхисем» ÿсеççĕ – сивĕтессе.

Хĕвел тÿп-тÿррĕн тухать - çил-тăмана. тренинг продаж

Çĕрле Уйăх вăйлă çутатать е вăл çук тăк тÿпере çăлтăр нумай – тепĕр кун уяр, сивĕ çанталăк пулать.

Уйăх шап-шуррăн курăнать - сивĕтессе.

Уйăх çумĕнче юпасем ку­рăнаççĕ – сивĕтессе.

Çĕн Уйăх хăяккăн çуралать – ăшша, тÿррĕн тăк – сивве.

Çăлтăрсем ытти чухнехинчен пĕчĕкрех курăнаççĕ – юр çăвасса.