Çамрăксен хаçачĕ 41 (6592) № 06.11.2025

Диплом илме каяс вырăнне — ЗАГСа

ВĂЛ ÇЫНСЕНЕ СĂМАХПА «ÇУНТАРАТЬ», ШӲТ КАЛАСА САВĂНТАРАТЬ, КĂМĂЛ-ТУЙĂМА ÇĔКЛЕТ, МИКРОФОНА АЛЛА ТЫТСАН ТУНСĂХЛАСА ЛАРАЙМĂН, ЙЫВĂР ШУХĂШСЕМ ТЕ ВĔÇСЕ КАЯÇÇĔ. РЕДАКЦИ ТĔПЕЛĔНЧЕ — ТЕЛЕЕРТӲÇĔ, БЛОГЕР, СТЕНДАП ĂСТИ ДМИТРИЙ ВЕРИЯЛОВ.

Дмитрий Тăхăрьял тăрăхĕнче — Тутарстанри Пăва районне кĕрекен Пӳркел ялĕнче — çуралса ӳснĕ. Ашшĕпе амăшĕ — педагогсем. Ялти шкулта ĕçленĕ. Ашшĕ — акăлчан чĕлхи, амăшĕ чăваш чĕлхи вĕрентнĕ. Михаил Петрович — тавра пĕлӳçĕ, Тăхăрьял тăрăхне тĕпчет, статьясем çырать, вăл тăрăшнипе шкулта музей уçнă. Амăшĕ — Патăрьел районĕнчи Пӳртлĕ ялĕнчен. Дмитрий мĕн ачаран хастар пулнă, шкул мероприятийĕсенчен юлман. Ун чухнех ертсе пырас ăсталăха туптама тытăннă, тĕрлĕ конференцие хутшăннă, илемлĕ вулакансен конкурсĕсенче пултарулăха аталантарнă, гитара калама вĕреннĕ. — Атте-анне пире Шупашкара экскурсие час-час илсе çӳретчĕç, çавăн чухнех хула ман кăмăла çавăрнă ахăртнех. Шкул хыççăн Хусана та, Чĕмпĕре те мар, Чăваш Енĕн тĕп хулине килтĕм. Географи урокĕсене юратса вĕренеттĕм те И.Н.Ульянов ячĕллĕ ЧПУн географи факультетне /кайран ăна истори факультечĕпе пĕрлештерчĕç/ суйларăм, — иртнĕ вăхăта куç умне кăларчĕ Дмитрий. Тăхăрьял каччи университетра та сцена çине тухнă: КВН, «Студентсен çуркунни»… — вĕренӳрен пушă вăхăтра аслă шкулти культура керменĕнче ирттернĕ. Сочири, Астраханьти КВН фестивалĕсене хутшăннă. «Студентсен çуркунни» командипе Чĕмпĕре, Хусана, Мускава çитнĕ. «Аслă курссенчи студентсем манăн наставниксем пулса тăчĕç. Халĕ те вĕсемпе çыхăну тытатпăр, тĕл пулатпăр. Вĕрентсе, пулăшса, хавхалантарса пыракансем пулни питĕ пĕлтерĕшлĕ, уйрăмах çамрăкшăн. 2013 çулта диплом илсен культура керменне ĕçлеме юлтăм, культура йĕркелӳçин тивĕçĕсене пурнăçларăм», — каласа кăтартрĕ Дмитрий. Çав вăхăталлах вăл «Европа плюс» радиона вырнаçнă, унта 2018 çулччен тăрăшнă. Çав çулах Наци телекуравне пырса кĕнĕ. Малтан хыпарсен службинче ĕçленĕ, унтан «Ир пулсан» телекăларăм ертӳçи пулса тăнă. Паянхи кун та ăна ирсерен сенкер экранпа курма пулать. Хальхи вăхăтра вăл Екатерина Ракчеевăпа пĕрле тӳрĕ эфира тухать. Дмитрий Вериялова республикăри, хулари пĕлтерĕшлĕ мероприятисене ертсе пыма шанаççĕ. Кăçал та, пĕлтĕр те Мускавра иртнĕ Акатуй ертӳçи пулнă. Кашни çул Шупашкарта йĕркелекен «Раççей симĕс ылтăнĕ» фестивальте, Шупашкар хулин кунне халалланă уяв сцени çинче ăна куратăн. Дмитрий Вериялов туйсене, юбилейсене, менелниксене хăйĕн пултарулăхĕпе илем кӳрет. «Ку ĕçе эпĕ университетра вĕреннĕ чухне пуçланă. Вун-вун туй, менелник хыçа юлчĕ ĕнтĕ. Эрнере 1-2 туй кĕрлеттереççĕ, эрне варринче те хăна пухакан пур. Çуллахи вăхăтра уйрăмах нумай, 3-4 туй ертсе пыма тивет. Чăвашла туйсем те ирттеретпĕр. Ытти регионти чăвашсем патне те чĕнеççĕ. Тĕслĕхрен, Чĕмпĕрте кăçал икĕ хут чăваш туйĕн ертӳçи пултăм», — пĕлтерчĕ Дмитрий. Сăмах май, вăл сценарисене хăех хатĕрлет. Телеертӳçĕн чи кирлĕ хатĕрĕ вăл — сасă. «Ăна упрамалла. Нумай калаçнипе сасă хытса ларнă самантсем те пулнă. Хыттăн кăшкăрма тăрăшмалла мар. Тĕслĕхрен, «Симĕс ылтăн» фестиваль 8 кун пырать. Кашни кун сăмах вакламалла, иртен пуçласа каçченех. Ун пек чухне сыхлансан та сасă хытса ларма пултарать. Ĕçлеме пуçличчен тĕрлĕ хăнăхтару туса сасса уçса ямалла. Мероприяти вĕçленсен 1 стр. ытлашши калаçмалла мар, шăппăн ларни лайăхрах. Сасă хытсан эмел ĕçни те пулăшмасть. Темиçе кунран кăна иртет, çавăнпа ялан асăрхануллă пулмалла. Хăш-пĕр чухне япăх сасăпах алла микрофон тытма тивет. Темиçе сехет пупленĕ хыççăн килте шăппăн ларас килет. Мăшăрăмпа ачасем ăнланаççĕ, питех чăрмантармаççĕ», — ĕç уйрăмлăхĕсемпе паллаштарчĕ Дмитрий. Сăмах май, унăн мăшăрне те чылайăшĕ паллать. Анна Голицына та телеертӳçĕ, филармонире тăрăшать, мероприятисене ертсе пырать, мюзиклсемпе спектакльсенче вылять. «Сцена çине темиçе хут та пĕрле тухрăмăр. Иккĕн ĕçлеме çăмăлрах, пĕр-пĕрне çур сăмахранах ăнланатпăр. Дуэтра кашнин хăйĕн ролĕ. Çĕнĕ çынпа малтанхи вăхăтра йывăртарах, пĕр-пĕрне хăнăхса çитмелле. Çавăнпа пĕлекен çынпа çума-çумăн тăни лайăхрах. Аннăпа эпир университетра паллашрăмăр, журналистика факультетĕнче вĕренетчĕ. Вăл та культура керменĕн хастарĕччĕ, çав тапхăртах ертӳçĕ тивĕçĕсене пурнăçлатчĕ. 2013 çулта пĕрлешрĕмĕр. Аслă шкула диплом илме каяс вырăнне эпир ЗАГСа утрăмăр», — кăмăлне ирĕке ячĕ паллă телеертӳçĕ. Верияловсен икĕ ача çитĕнет. Çавăнпа канмалли кунсене çемьепе пĕрле ирттерме тăрăшать. «Урамра, паркра уçăлса çӳретпĕр, ăшă кунсенче пикник тăватпăр. Çул çӳреве тухатпăр: кӳршĕ регионсене, тĕрлĕ хулана кайса куратпăр. Юлашки вăхăтра Мускавра, Чулхулара, Хусанта пулнăччĕ. Яла атте-анне патне çитсе килетпĕр», — терĕ Дмитрий. Дмитрий Вериялов соцсетьсенче блог тытса пырать. «Çынсен кăмăл-туйăмне çĕклекен блог. Шӳтпе пуян. Вăл професси ăсталăхне ӳстерме пулăшать. Блог валли те сценари хатĕрлетĕп. Ӳкермелле, монтаж тумалла. Çак ĕçе пĕччен тумастăп, пулăшакансем пур. Кĕске видеороликпе те нумай ĕçлемелле», — калаçăва малалла тăсрĕ телеертӳçĕ. <...>

Андрей МИХАЙЛОВ.

Материалсемпе туллин паллашас тесен...

www.hypar.ru