Каллех — "ылтăн"
Шупашкарта пурăнакан Алексей Германовпа Чăваш Ен чăннипех те мухтанма пултарать. Çамрăк спортсмен çитĕнÿсемпе савăнтарать. Хальхинче те вăл Португалире спорт аэробики енĕпе иртнĕ Европа чемпионатĕнчен çĕнтерÿпе таврăннă.
Олимп резервĕсен ачасемпе çамрăксен 6-мĕш спорт шкулĕнче вĕренекен Алексей Германов Раççейĕн пĕрлештернĕ наци командине кĕнĕ. Пирĕн спортсменсем «Ташă гимнастики» тата «Гимнастика платформи» дисциплинăсенче чи нумай балл пухнă. Ку - Алексей Германовăн Европа чемпионачĕсенче çĕнсе илнĕ тăваттăмĕш ылтăн медалĕ. Икĕ çул каялла вăл Европăн икĕ хут чемпионĕ пулнă. Пĕлтĕр вара тĕнче чемпионĕн ятне тивĕçнĕ.