Çĕнĕ спектакльсен вăхăчĕ
К.В.Иванов ячĕллĕ Чăваш патшалăх академи драма театрĕ "Вĕри юнлă çемçе чун" спектакльпе /И.Максимов-Кошкинский/ 98-мĕш сезонне уçрĕ. Çуркуннехи премьерăна куракансем ăшшăн йышăннăччĕ. Çавна май театрăн тĕп режиссерĕ, СССР халăх артисчĕ Валерий Яковлев ку ĕç ăнăçлă пулса тухни çинчен каланăччĕ.
Авăн уйăхĕн 30-мĕшĕнче сцена ăстисем Чăваш халăх çыравçи Николай Терентьев пьеси тăрăх хатĕрленĕ "Ыйăх çухатнисем" спектакль кăтартĕç. Унăн режиссерĕ - Чăваш Республикин тава тивĕçлĕ артисчĕ Валерий Карпов.
Çавнашкалах çак авторăн тепĕр пьесипе - "Манăн çăлтăр тÿпере" трагикомедипе - паллашма май пулĕ. Владислав Николаевăн "Пихампар чунĕ манра" мюзиклне ЧР Пуçлăхĕн гранчĕ сцена çине кăларма пулăшĕ. Марина Карягинăн "Куккуклă сехет" ĕçне Çĕнĕ çул хыççăн хак пама май килĕ.
Марина ГРИГОРЬЕВА.