Г.С.Лебедев ячĕллĕ лицей шăпи
Чылай çынна тахçантанпах пăшăрхантарнă Г.С.Лебедев ячĕллĕ интернат лицей шăпине татса парасшăн. Ку ыйтăва нумаях пулмасть сÿтсе явнă.
ЧР Вĕренÿ министерствин тата Шупашкар хула администрацийĕн представителĕсем шухăшланă тăрăх, ăна 4-мĕш лицейпе пĕрлештерсен лайăхрах. Г.Лебедев ячĕллĕ лицейăн корпусне филиал тума сĕнеççĕ. Кун хыççăн вăл ахаль шкул пекех пулĕ. Анчах Шупашкарти кăнтăр-хĕвеланăç районĕнчи çивĕч ыйтăва татса парĕ. Унта шкулсенче вырăн çителĕксĕр. 2014-2015 вĕренÿ çулĕсенче районти шкулсенче 6075 вырăн пулнă, пĕтĕмпе вара 7297 ача вĕреннĕ. Унта çĕнĕ микрорайонсем çĕкленнĕ май демографи лару-тăрăвĕ те лайăхланать. Çавна май ачасем виçĕ сменăпа вĕренме пуçлас хăрушлăх пур. Интернат лицейра 450 вырăн пулсан 50 тата 61-мĕш шкулсенче икĕ сменăпа мар, пĕррепе вĕренме пуçламалла. Малтанлăха палăртнă тăрăх, Г.С.Лебедев ячĕллĕ лицей интернатăн вĕренÿ корпусĕ 2016 çулхи сентябрĕн 1-мĕшĕнче ĕçлеме тытăнмалла.