Архив - 19 Янв, 2017 - Çамрăксен хаçачĕ

Кăçал ЧР Пуçлăхĕн стипендине Олимп резервĕсен Шупашкарти 2-мĕш спорт шкулĕнче ăсталăхне туптакан 10 çамрăк илсе тăрĕ. Вĕсен йышĕнче сăрт-ту йĕлтĕр спорчĕн уйрăмĕн хастарĕ Илья Малов та пур. Вăл фристайлпа кăсăкланать. Унпа «Вертикаль» сăрт-ту йĕлтĕр центрĕнче тĕл пултăмăр.

«Эсир сивĕ шыва чăмса курнă-и? Эппин, унтан мĕнле кăмăл-туйăмпа тухнине хăвăрах пĕлетĕр», — терĕ Андрей Горяинов вакра пĕрремĕш хут шыва кĕнине аса илме ыйтсан. Шел, эпĕ чăмма мар, ишме те пĕлместĕп. «Вара мĕнле?» — ыйтмасăр чăтаймарăм унран. 27 çулти Андрей сивĕ шывран тухсан организм тонусĕ хăпарнине калама тытăнсан унăн куçĕ савăнăçпа çиçрĕ, вăл ку енĕпе пĕр-пĕр ăсчахран та лайăхрах пĕлнĕн туйăнчĕ. Кашни çул Кăшарнире вакра чÿхеннисĕр пуçне çамрăк арçын хĕлле сивĕ шывра ишессипе ăмăртса медальсем çĕнсе илет. Хальлĕхе унăн рекордне Раççейре никам та çĕнетеймен. Малалла вулас...

Тÿрĕ эфирта итлĕпĕр

Чăваш Ен ертÿçи Михаил Иг­натьев ЧР Патшалăх Канашне Çырупа тухма хатĕрленет. Ăна вăл эрнекун, кăрлачăн 20-мĕшĕнче, 12 сехетре Чăваш патшалăх оперăпа балет театрĕнче вулĕ.

Çырăва хатĕрленĕ чухне çын­­­сен сĕнĕвĕсене шута илнĕ. Ми­хаил Игнатьев хăйĕн сăмахĕнче малашлăхри плансене палăртĕ. Çырăва Наци телекуравĕ тÿрĕ эфирта кăтартĕ, Чăваш наци радиовĕпе те итлеме май пулĕ. Унсăр пуçне республикăн влаç органĕсен официаллă порталĕнче курма май килĕ. Малалла вулас...

Хунарпа журналист хушшинче мĕнле пĕр пеклĕх пур? Кăрлачăн 14-мĕшĕнче иртнĕ Пичет кунне кайиччен эпĕ кун çинчен шухăшламанччĕ. Хуравĕ ансат-иç — иккĕшĕ те çутатаççĕ! Чăваш патшалăх филармонине кĕрсенех хунар тыттарчĕç. Парне ку. Вăл мĕн тума кирли “Пире çутатма вăхăт” девизпа иртнĕ уяв пуçлансан паллă пулчĕ. Çăлтăрлă тÿпе тейĕн, вун-вун хунар çути йăмăхрĕ залра. Малалла вулас...

Вăл — тухтăр, анчах сиплемест, унăн шухăшĕ медицинăри чылай специалистшăн питĕ пĕлтерĕшлĕ. Вăл — чи лайăх диагностик, çапах унăн “пациенчĕсем” нимĕн ыратнине те шарламаççĕ. Органсен пĕчĕк пайĕсене тĕпчесех вăл пысăк та тĕрĕс пĕтĕмлетÿсем тăвать. Унăн “пациенчĕсем” вилнĕ, анчах ку специалист питĕ кирлĕ. Тавçăртăр пулĕ: калаçу патологоанатом пирки пырать. Паян эпир ăна хăйне, микроскоппа пăхнă евĕр, тĕпчĕпĕр. Мĕн хистенĕ çак профессие суйлама? Виле кунсерен касакан, унăн ăш-чикне уçса тĕпчекен тухтăрăн мĕнле çын пулмалла? Тахçантанах кăсăклантарнă ыйтăва уçăмлатма Шупашкарти Пирогов урамĕнче вырнаçнă республикăри судпа медицина экспертизин бюровне çитрĕм. Малалла вулас...

Вăл чăваш пичечĕшĕн нумай ĕç тунă, «Хыпар» Издательство çуртне 23 çул ертсе пынă. «Хыпар» хаçатпа тата унăн кăларăмĕсемпе нумай-нумай çул туслисем сăмах кам пирки пынине, ахăртнех, ăнланчĕç: Алексей ЛЕОНТЬЕВ çинчен. Чăваш пичечĕн уявĕ умĕн «Хыпар» историне тата Николай Никольский пурнăçĕпе пултарулăхне тĕпченĕ Алексей Петровича «Чуна уçса калаçар» рубрика тĕпелне йыхравларăмăр.

Пилĕк çул каялла хаçатра «Интернатра лайăх-и, çемьере-и?» рубрикăна ертсе пынă май 5 е унран ытларах ачана опекăна илнĕ çемьесемпе тĕл пулнăччĕ. Вулаканăмăрсене тăлăхсен вун-вун шăпипе паллаштарнăччĕ. Чи çывăх çыннисен ăшшисĕр тăрса юлнисене хăйсен хÿттине илсе пархатарлă ĕç тăвакан çемьесем çинчен пирĕн хаçатра кулленех статьясем пичетленеççĕ. Чăваш Енре Амăшĕпе Ашшĕн çулталăкĕ пулнă май çĕнĕ рубрика пуçарма шухăшларăмăр. Хальхинче юратупа ăшăлăха ют çемьере тупнă тăлăхсене сăмах парас терĕмĕр. Ачалăхĕ мĕнпе асра юлнă? Тăванран та çывăх пулса тăнă, хăйсен ăшă çунатти айĕнче ÿстернĕ ашшĕпе амăшне вĕсем мĕнле хаклаççĕ?

Пĕлтĕрхи çу уйăхĕнче Шупашкарта пурăнакан Надеждăпа Григорий Моисеевсен çемйинче виççĕмĕш ывăл Антон çуралнă. Пепке 3542 грамм тайнă, çÿллĕшĕ — 52 сантиметр. Чăн-чăн пăхаттир! Амăшĕпе ывăлне ача çуратмалли çуртран кăларасса килтисем чăтăмсăррăн кĕтнĕ. Акă вăл телей!

Анне кашни çыннăн пурнăçĕнче пĕлтерĕшлĕ вырăн йышăнать. Çакна тата кăçал Чăваш Енре Амăшĕпе Ашшĕн çулталăкĕ пулнине шута илсе хаçатра «Манăн анне» фотоконкурс йĕркелеме шухăшларăмăр. Сăнÿкерчĕке редакцин электрон почтине molgazeta@rambler.ru адреспа ярса памалла. Çырура çывăх çыннăр пирки тĕплĕнрех çырса пĕлтерме ан манăр.

Конкурс çĕнтерÿçине çулталăк вĕçĕнче палăртăпăр. Ăна эсир, хаклă вулаканăмăрсем, суйлама пултаратăр. «Контактра» соцсетьри «Çамрăксен хаçачĕн» ушкăнне кĕрсе килĕшекен сăнÿкерчĕкшĕн «лайк» лартмалла. Хаклă вулакансем, эсир конкурса хастар хутшăнасса шанатпăр!