Йĕлме йĕлтĕр çул хывать
17 Ноября, 2016 | Спорт

Тавралăх шап-шурă юрпа витĕнсенех йĕлтĕрпе ярăнма юратакансем йĕлтĕр çине тăраççĕ. Район центрĕсенчи, вĕренÿ учрежденийĕсенчи стадионсемпе футбол уйĕсем хĕлле катока тата йĕлтĕр трассине çаврăнаççĕ.

Сăмахран, Чăваш Ен тĕп хулинче кашни çул йĕлтĕрпе ярăнмалли 16 вырăн хатĕрлеççĕ. Тĕп трассăсем Çĕнĕ Лапсарти спорт шкулĕнче, спортăн хĕллехи тĕсĕсен центрĕнче, Сосновка поселокĕнче вырнаçнă. Сăмах май, вĕсенче йĕлтĕр спорчĕн секцийĕсем аван ĕçлеççĕ. Çавăн пекех йĕлтĕрçĕсене Берендей вăрманĕнче, Гузовский паркĕнче, «Олимпийский» стадионта, «Шупашкар: 500 çул» культурăпа кану паркĕнче, залив хĕрринче, Трактор тăвакансен культура керменĕ çумĕнчи вăрманта тата ытти вырăнта курма пулать.

«Пирĕн спортсменсем пĕрремĕш юр çусанах йĕлтĕрпе чупаççĕ. Кăçал юпа уйăхĕн вĕçĕнчех юр çурĕ. Биатлон центрĕнче юсав ĕçĕсем пынине пула йĕлтĕр трассине урăх вырăна куçартăмăр. Унта кулленех тренировкăна тухаççĕ. Шкул ачисемпе çамрăксем те курăнма тытăнчĕç», — пĕлтерчĕç центр ĕçченĕсем. Вĕсем каланă тăрăх — трасса çинче пурте ярăнма пултараççĕ. Спорт шкулĕнче йĕлтĕрсене тÿлевлĕ майпа вăхăтлăх усă курма та параççĕ.

Çĕнĕ Лапсарти йĕлтĕр базинче те çак кунсенче сезон уçăлнă. Унта 500, 1000-3000 тата 5000 метрлă трассăсем хатĕрленĕ. «Яланхи пекех трассăна чи малтан çамрăк спортсменсем тĕрĕслесе пăхнă. Анчах çынсем йĕлтĕр çине тăма васкамаççĕ-ха хальлĕхе», — терĕ А.Тихонов ячĕллĕ спорт шкулĕн директорĕ Татьяна Иванова. Сосновкăри йĕлтĕр трасси те чÿк уйăхĕн 1-мĕшĕнче ĕçлеме пуçланă. Вырăнти спорт шкулĕн воспитанникĕсемсĕр пуçне унта сывă пурнăç йĕркине тытса пыракансем те тухнине палăртрĕç спорт учрежденийĕн ĕçченĕсем.

Хальхи вăхăтра пур çĕрте те йĕлтĕр трассисене хатĕрлеççĕ. Вĕсене йĕркене кĕртсе çитернĕ хыççăн çынсем ытларах тухма пуçласса шанаççĕ яваплă çынсем. Сăмах май, трассăсене «Буран» снегоходсемпе хытараççĕ. Çÿлерех асăннă спорт шкулĕсенче кунашкал техника çителĕклех. ЧР Пуçлăхĕ Михаил Игнатьев та çынсене йĕлтĕрпе ярăнма условисем часрах туса пама хушнă.

Хула администрацийĕн физкультурăпа спорт управленийĕн пресс- служби пĕлтернĕ тăрăх — Шупашкарта çавăн пекех конькипе ярăнмашкăн 15 каток пулĕ, картишсемпе шкул терри-торийĕсенче 15 хоккей курупки ĕçлĕ, чылай вĕренÿ заведенийĕпе кашни микрорайонта футболла вылямалли лапам хатĕрлĕç, снегоходпа ярăнмалли ятарлă трасса та тăвĕç.

Хĕллехи сезона хатĕрленес ĕç районсенче те аван пырать. Калăпăр, Шăмăршă тăрăхĕнче йĕлтĕр трассисене хырлăх паркĕнче тума палăртнă. Йĕлтĕрпе ярăнма юратакансем валли 2, 3 тата 5 километрлă трассăсем пулĕç. «Туслăх» спорт керменĕн ĕçченĕсем каланă тăрăх — çак вырăнта «Йĕлтĕр йĕрĕ» массăллă чупу тата районти ытти ăмăрту иртĕ. Вăрмар тăрăхĕ те йĕлтĕрçĕсен турнирĕсемпе паллă. Поселокра, Чупай, Энĕшпуç, Аялти Кинчер, Тикаш ялĕсенче çулсерен тĕрлĕ ăмăрту  йĕркелеççĕ. Кăçал та 21 вырăнта йĕлтĕр трасси хатĕрлĕç.