Уява халалласа — портал
10 Aug, 2016 | Хула

Интернетра Шупашкар хула кунне халалланă www.cheboksary547.ru информаци порталĕ ĕçлеме пуçланă. Вăл хулара пурăнакансемпе хăнасене уява халалланă мероприятисем пирки лайăхрах пĕлме май парать.

Çак ресурс урлă çынсем ăçта мĕнле проектсем, фестивальсем, конкурссем ирттерме палăртнине пĕлсе тăрĕç. Аса илтеретпĕр: Шупашкар 547 çул тултарнине çурла уйăхĕн 21-мĕшĕнче уявлама йышăннă. Çапах конкурссемпе пултарулăх проекчĕсем парксенче, скверсенче, стадионсемпе тÿремсенче темиçе эрне пырĕç. Паллах, нумайăшĕ килĕштерекен мероприятисем те иртĕç: «Пултарулăх бульварĕ» арт-проект, çемье пултарулăхĕн «Аист чĕппи» фестивалĕ, «Чемпионсен кубокĕ» турнир, «Çăлтăрпа тунă ирхи зарядка»… Ĕç çыннин çулталăкне халалласа хулари предприятисемпе организацисен «Шупашкар — ĕç мухтавĕн хули» фестивальне йĕркелеме палăртнă.

Чапаев скверĕнче Василий Чапаева халалласа уяв иртĕ. Çурлан 20-мĕшĕнче вăл çынсене чей ĕçме «чĕнĕ». Унтах дивизи командирĕн пĕчĕк штабне йĕркелĕç: сĕтелçи вăййисен «Чапай» турнирне, ача-пăча конкурсĕсене чылайăшĕ хутшăнма пултарĕ. Çав вырăнтанах 22 сехетре каçхи велочупу старт илет. «Раççей туризм мисĕ-2016» конкурс та, Раççей халăх артисчĕн Олег Газмановăн концерчĕ те, фейерверк та халăха килĕшессе шанаççĕ йĕркелÿçĕсем. Программăпа тĕплĕнрех маларах асăннă информаци порталĕнче паллашма пулать.