Паян ЧР Общество палатинче "çавра сĕтел" иртрĕ. Унта федерацин "Вăxăта шутласа палăртасси" саккунĕн 5-мĕш статйине улшăнусем кĕртесси пирки калакан саккун проектне сÿтсе яврĕç.
Бизнес представителĕсем йышлăн пухăннă та — республикăн инвестици политики енĕпе ĕçлекен канашĕн ытларикун Чăваш патшалăх драма театрĕнче иртнĕ ларăвне ЧР пуçлăхĕ «эпир сирĕншĕн яланах уçă пулнă, малашне те уçă пулăпăр» тесе шантарнинчен пуçларĕ. Унăн сăмахĕсене лару чăннипех çирĕплетрĕ: влаçпа бизнес хушшинчи уçă диалог пулчĕ.
Министрсен Кабинечĕн тунтикунхи ларăвĕн кун йĕркинче пĕртен-пĕр ыйту пулчĕ: республикăн 2018 çулхи бюджетне тÿрлетÿсем кĕртессине татса пачĕç. Бюджетăн тупăш пайĕ 193 миллиона яхăн тенкĕлĕх пысăкланать.
Шучĕпе ку бюджетăн кăçалхи тăваттăмĕш тÿрлетĕвĕ пулать. Асăннă укçа — Мускав регион влаçĕсен налук пухмалли майсене анлăлатас, экономикăна аталантарас тĕллевлĕ ĕçне хакланин кăтартăвĕ. «Премие» çĕршывăн хĕрĕх регионĕ илет. Чăваш Ен те çак ретре.
«Наркотик суту-илĕвĕнче питĕ пысăк укçа çаврăнать – вун-вун миллион тенкĕ. Саккунсăр çак бизнес çавăнпа чылайăшне илĕртет те. Анчах эпир çак пулăмпа ăнăçлă кĕрешнĕ, малашне те çине тăрса кĕрешĕпĕр», — Чăваш Республикинче наркотиксемпе кĕрешекен комиссии ларăвне ЧР Пуçлăхĕ Михаил Игнатьев çапла каласа пуçларĕ. Çапах хăех палăртрĕ: ку сферăра ĕçлемелли пайтах-ха. Чи кирли — тивĕçлĕ сигналсене курмăш-илтмĕш туманни, çапла майпа çеç йĕрке тума май пулĕ.
Кăçалхи кăрлач — юпа уйăхĕсенче республика бюджетне тупăш енĕпе 39 миллиард ытла тенкĕлĕх пурнăçланă. Палăртма кăмăллă: çак виçере хамăрăн тупăш 62% танлашать — налук тÿлевĕсем 12% пысăкланнин витĕмĕ куçкĕрет. Çак тата ытти цифрăна финанс министрĕ Светлана Енилина Министрсен Кабинечĕн Иван Моторин премьер ертсе пынипе паян иртнĕ ларăвĕнче ЧР бюджетне мĕнле пурнăçлани пирки отчет тунă май пĕлтерчĕ.
Чăвашла верси
Русская версия
