Публицист шухăшĕ

Тунтикунхи канашлу ял хуçалăх министрĕ Сергей Артамонов йăлана кĕнĕ çĕр улми куравĕ иртесси çинчен пĕлтернипе вĕçленчĕ. Регионсен пĕрлехи куравĕ шучĕпе 15-мĕш пулĕ. Вăл пуш уйăхĕн 2-3-мĕшĕсенче Шупашкарти «Каскад» суту-илӳ комплексĕнче иртĕ. Унта Раççейри 22 регионти тата Беларуçри 91 компани хутшăнассине çирĕплетнĕ ĕнтĕ. Ку йыш пĕлтĕрхинчен пысăкрах — çакă та, паллах, Чăваш Енри курав хисепĕ-сумĕ ӳссе пынине çирĕплетет.

Чăваш Ен Пуçлăхĕ Олег Николаев тунтикун ирттернĕ канашлура апат-çимĕç, эмелсен хакĕсемпе çыхăннă ыйтăва тишкерчĕç. Экономика аталанăвĕн министрĕ Дмитрий Краснов пĕлтернĕ тăрăх, 2022 çулта республикăра инфляци шайĕ 12,2% танлашнă, ку Раççейри вăтам кăтартуран /11,9%/ кăшт пысăкрах. Апат-çимĕç хакĕсем пысăкланни тĕнче рынокĕнчи лару-тăруран, çавăн пекех логистика кăткăсланнипе, Анăç Раççей тĕлĕшпе йышăннă санкцисемпе сăлтавланнă. Çапах кăрлачра хăш-пĕр апат çимĕçĕн хакĕ чакнине палăртма кăмăллă.