Шупашкарти Ленин районĕн прокурорĕн аслă пулăшуçи Ф.Кадырова пĕлтернĕ тăрăх - ĕçлевĕн вăрттăн рынокне легализацилес тĕллевпе райпрокуратура "хĕрÿ лини" телефонĕпе анлăн усă курать. 62-25-51 - çак телефонпа шăнкăравласа хăйĕн ĕç прависене пăсни çинчен кашниех пĕлтерме пултарать.
Чăваш Енĕн «Уçă кăтартусем» порталĕ регионри уçă кăтартусен рейтингĕнче Раççейре - 3-мĕш, федерацин Атăлçи округĕнче вара 1-мĕш вырăнсене йышăннă. Интернет-ресурс Раççей саккунĕсене, экспертсен тата унпа усă куракансен ыйтăвĕсене 92,6% тивĕçтерет.
Çĕртме уйăхĕн 13-мĕшĕнче Чăваш Ен Пуçлăхĕ Михаил Игнатьев "Раççей" автоэкспедицие хутшăнакансемпе тĕл пулнă. Ăна паллă çул çÿревçĕ тата блогер Сергей Доля ертсе пырать.
Экспедици тĕллевĕ уçăмлă - 40-е яхăн хулара пулмалла, пирĕн çĕр-шывăн картти çине "Раççей" сăмаха çырмалли маршрутпа 20 пин ытла çухрăм автомобильпе каймалла. Проектăн тĕп тĕллевĕ - Раççейĕн паллă вырăнĕсемпе историйĕ çинчен каласа кăтартасси, шалти туризма сарма пулăшасси, Интернетпа усă куракансем тата Рунет тулашĕнчи аудитори патне çак шухăша çитересси: "Раççей тăрăх çул çÿресси кăсăклă та çăмăл".
Украинăри хирĕç тăруллă лару-тăрăва пула Чăваш Ене те халăх куçса килет. Малтан шута илнĕ 4 пин ытла çын çумне юлашки вăхăтра кăна тата 766 çынна шута илнĕ.