Паян Шупашкарти "Хула тĕп больницинче" "Çамрăксем - Чăваш Енри ĕç вăйĕ" дискусси иртрĕ. Асăннă медицина учрежденийĕнче чирлисене пахалăхлă медицина пулăшăвĕ парас ыйтăва пăхса тухрĕç. Пĕлтерĕшлĕ çак мероприятие ЧР Вĕрентÿ тата çамрăксен политикин, Чăваш Енри Çамрăксен правительствин пуçарăвĕпе йĕркеленĕ.
Раштавăн 14-мĕшĕнче Мускаври «Мастерславль» çемье паркĕнче «Памятки ответственным родителям» кĕнеке презентацийĕ иртнĕ. Вăл ашшĕ-амăшне ачасене тĕрĕс воспитани пама пулăшать. Кĕнекери сĕнÿсене шăпăрлансем хăйсем сĕннĕ. Ăна йывăрлăха лекнĕ ачасене пулăшакан фондпа «Я - родитель» портал пуçарăвĕпе «Ача комитечĕ. Ашшĕ-амăшĕ валли сĕнÿсем» конкурс пĕтĕмлетĕвĕпе килĕшÿллĕн хатĕрленĕ.
Шупашкарта Таланцевсене, пиччĕшĕпе шăллĕне, халалласа палăк лартнă. Ăна ыран уçма палăртнă.
Палăка Леонид Белов меценат пуçарăвĕпе ăсталанă. Вăл Зиновий Таланцев бюсчĕ евĕр. Аса илтерер: Таланцевсем XIX ĕмĕрте пурăннă. Вĕсем Чăваш Республикишĕн ырă ĕç нумай тунă. Таланцевсем пулăшнипе вĕренÿ заведенийĕсем уçăлнă, хаçатсем тухнă, учительсен пĕрлĕхĕ йĕркеленнĕ… 1954 çулта ЧР Наци библиотекине вĕсен кĕнеке пуххисене куçарнă. Çавăнпах палăка ун çывăхĕнче çĕкленĕ.
Çĕнĕ çул умĕн Чăваш Енре тепĕр конкурс иртĕ. Республикăри ялсен хушшинче «Çĕнĕ çулхи тĕп хула» конкурс йĕркеленĕ. Ăна раштав уйăхĕн 9-мĕшĕнчен пуçласа 2016 çулхи кăрлач уйăхĕн 30-мĕшĕччен ирттереççĕ.
Канаш районĕн сучĕ 46-ри хĕрарăм тĕлĕшпе пуçарнă ĕçе пăхса тухса пăнчă лартнă. Ăна çынна вĕлерме тăнăшăн айăпланă, 3 çул çурăлăха ирĕксĕр хăварма йышăннă.
Следстви тата суд çакна палăртнă: çурла уйăхĕнче Янкăлч хĕрарăмĕ килĕнче упăшкипе пĕрле эрех ĕçнĕ те хирĕçсе кайнă. Мăшăрне вăл кăкăрĕнчен çĕçĕпе виçĕ хутчен чикнĕ, чĕринех лектернĕ. Арçын унăн укçине тăкаклани, эрех туянса юлташĕсене хăналани килĕшмен арăмне. Медицина пулăшăвне вăхăтра панипе кăна арçын вилĕмрен çăлăнса юлнă.
Чÿк уйăхĕн 27-29-мĕшĕнче Питĕрте "Пуласлăх шкулĕ" IV Пĕтĕм Раççей вĕренÿ форумĕ иртнĕ. Форумра "Раççейри хушма пĕлÿ паракан чи лайăх 100 организаци" конкурса пĕтĕмлетнĕ. Вăл - обществăн хушма вĕренÿ хутлăхĕнчи чи сумлă наградисенчен пĕри.
Асăннă конкурсра Шупашкарти Ача-пăча пултарулăх çурчĕ лауреат ятне илнĕ, "Раççей хушма вĕренĕвĕн чи лайăх 100 организацийĕ" ылтăн медале тивĕçнĕ. Пултарулăх çурчĕн директорне Елена Воробьевăна "Çулталăк директорĕ - 2015" хисеп паллипе чысланă.
Раштав уйăхĕн 16-мĕшĕнче Чăваш Ен Пуçлăхĕ Михаил Игнатьев Правительство çуртĕнче ВТБ банк правленийĕн членне Чаба Зентаине йышăнчĕ. Раççейри финанс ушкăнĕсенчен чи пысăккисенчен пĕри шутланакан банкпа республика хушшинчи çăхăнăва çирĕплетес ыйтăва сÿтсе яврĕ.
Раштав уйăхĕн 16-мĕшĕнче «Шупашкар хула стоматологийĕн» тепĕр поликлиники Алькеш поселокĕнче уçăлчĕ.
РФ Президенчĕ çумĕнчи Ача прависемпе ĕçлекен Уполномоченнăйăн Павел Астаховăн рейтингĕнче Чăваш Республики ачасене пурăнма чи лайăх 10 регион йышне кĕнĕ. Тĕпчев пĕтĕмлетĕвĕпе омбудсмен раштавăн 15-мĕшĕнче ТАСС пресс-конференцийĕнче паллаштарнă.
Чăвашла верси
Русская версия
