Ĕç тăвакан влаç тата муниципалитетсен ертÿçисемпе Чăваш Республикин Пуçлăхĕ Михаил Игнатьев тунтикунсерен ирттерекен планерка грипп тата ОРВИ чирĕсемпе çыхăннă лару-тăрăва лайăхлатас енĕпе йышăннă мерăсемпе паллашнинчен пуçланчĕ. Чăваш Енре асăннă чирсем сарăласси эпидеми шайне çитмен пулин те сывлăх сыхлавĕн органĕсем лару-тăрăва çирĕп сăнаса тăраççĕ.
Çĕнĕ çулхи «Чăваш Енре канма вăхăт» проекта иртнĕ вырсарникун тĕп хулари Трактор тăвакансен культура керменĕнче пĕтĕмлетрĕç. Аса илтерер: республикăра Çĕнĕ çул уявĕпе çыхăннă тĕлĕнмелле проектсем хатĕрленĕччĕ: Шупашкарта Асамлăх академийĕ ĕçлерĕ, Çĕнĕ çул бульварĕ хăнасене йышăнчĕ, районсемпе тата хуласемпе паллашмашкăн «Пĕр район юмахĕ» нумай пулăшрĕ. Вăл Çĕнĕ Шупашкар, Сĕнтĕрвăрри, Çĕрпÿ хулисене, Шупашкар тата Етĕрне районĕсене илсе çитерчĕ.
Йĕпреç районĕнчи «Рассвет» АУО сунарçи Леонид Михайлов ертсе кайнă 20 яхăн акарçăран тăракан ушкăн Вăрнар районĕнчи Чăрăш Ишек ялĕ патĕнчи вăрманта кăрлачăн 30-мĕшĕнче - 3 кашкăр, тепĕр кун 4-мĕшне тытнă.
Çавăн пекех хастар кайăкçăсем иртнĕ уйăхра Йĕпреç районĕнчи Юнтапа ялĕн çывăхĕнчи вăрманта тата Вăрнар районĕнчи Кÿстÿмĕр ялĕн таврашĕнче 1-ер кашамана «капкăна çаклатнă».
Вăрнар районĕн шалти ĕçсен пайĕнче ирхине 3 сехет тĕлнелле телефон янăраса кайнă. Хĕрарăм райцентрти Путевая урамра пурăнмалли барак çунни çинчен пĕлтернĕ.
Дежурнăй пĕр тăхтамасăр унта оперативлă следстви ушкăнне - уголовлă шырав уйрăмĕн пуçлăхне Станислав Николаева, аслă участковăя Ираида Тихоновăна, аслă следователе Сергей Атюкина тата Александр Смирнов водителе - ăсатнă.
Шупашкар районĕн прокуратури ĕç паракансем ĕçлев саккунĕсене пăхăннине куçран вĕçертмест. Зельфинас Карама прокурор пĕлтернĕ тăрăх - тĕрĕслевсем ирттернĕ май темиçе предприятире саккуна уяманнине тупса палăртнă.
Пĕтĕм Раççейĕн 2016 çулхи ял хуçалăх çыравĕ умĕнхи хыпарлавпа килĕшÿллĕн профессионал фотографсемпе сăн ÿкерме юратакансен ĕçĕсен конкурсне ирттереççĕ. Унăн тĕллевĕ - ялти пурнăçăн илĕртÿлĕхне, унăн çыннисен йăли-йĕркине тата çитĕнĕвĕсене, ял хуçалăхăн ырă енĕсене кăтартасси.
2016 çулхи нарăс уйăхĕн 1-мĕшĕнче федераци çăмăллăхçисен уйăхри укçа тÿлевĕн виçине тата соцпакет хакне ÿстернĕ.
Пирĕн республикăра асăннă ушкăна 105,5 пин çын кĕрет, вĕсен 80 проценчĕ - инвалидсем. Уйăхри укçа тÿлевĕ вăтамран 140 тенкĕ хăпарса 2,2 пине çитнĕ. Федераци çăмăллăхçисене тÿлемешкĕн кăçал 2,7 млрд тенкĕ тăкаклаççĕ.
Соцпакет хакĕ уйăхра 995,23 тенкĕпе танлашать, çав шутра: эмел пайĕ - 766,55, санаторипе курорт пайĕ - 118,59, транспорт пайĕ /хула çум пуйăсĕпе тÿлевсĕр çÿресси тата санатори сиплевĕн вырăнне кайса килесси/ - 110,09 тенкĕ.
РФ Пенси фончĕн республикăри уйрăмĕ пĕлтернĕ тăрăх - Чăваш Енре пурăнакан 17,5 пин ытла çын иртнĕ çул Пенси фончĕн пулăшăвне тивĕçмешкĕн нумай функциллĕ центрсене пынă.
Чылайăшĕн ыйтăвĕ амăшĕн капиталĕн сертификатне йĕркелессипе, унăн укçипе хуçаланассипе /53 процент/ тата обязательнăй пенси страхованийĕн свидетельствине илессипе /40 процент/ çыхăннă.
Граждансене çавăн пекех пенси тÿлевне çитермелли майсем, пухăнса пыракан укçана инвестицилесси, соцпакета хирĕçлесе е çĕнĕрен йĕркелеме килĕшсе заявлени парасси интереслентернĕ.
Паян И.Н. Ульянов ячĕллĕ Чăваш патшалăх университетĕнче "Аслă шкул наукипе регионти экономика çыхăнăвĕ" "çавра сĕтел" иртрĕ. Ăна Раççей Наука кунне халалланă. Кунтах ЧПУра ĕçлекен ученăйсен ăслăлăхри çитĕнĕвĕсемпе паллаштаракан куравне йĕркеленĕ.
Чăвашла верси
Русская версия
