ЧР Çут çанталăк ресурсĕсемпе экологи министерствин 2015 çулхи ĕçĕ-хĕлне пĕтĕмлетесси, культура еткерĕн усă курман объекчĕсене /историпе культура палăкĕсене/ тара памалли хака палăртасси, сусăр ачасене паха пĕлÿ илмешкĕн тивĕçлĕ условисем йĕркелесси — çак тата ытти ыйту Министрсен Кабинечĕн Чăваш Ен Пуçлăхĕ Михаил Игнатьев ертсе пынипе иртнĕ ларăвĕнче тĕп вырăнта пулчĕç.
Тăван çĕршывăн Аслă вăрçи пуçланнă кун Шупашкарта пурăнакансемпе хула хăнисем çулленех «Çĕнтерÿ» мемориал комплексне пухăнаççĕ: çапăçу хирĕнче пуç хунă ентешсене Астăвăмпа хурлану кунĕнче сумлаççĕ, вĕсемпе мăнаçланнине, паттăрлăхĕ пархатарлă ывăл-хĕрĕн, мăнукĕсен чĕринче манăçманнине çирĕплетеççĕ.
Ача-пăча тухтăрĕн общество пурнăçĕнчи пĕлтерĕшĕ çав тери пысăк: вăл пулас ăрăва сывă та таса çитĕнтерессишĕн çине тăрать. Шăпах çакăн пек пулнă та ĕнтĕ пурнăç тĕллевĕ ăста та паллă хирургăн Станислав Николаевăн.
Шупашкар районĕн Акатуйĕ çĕртмен 17-мĕшĕнче Пархикассинче иртрĕ. Хальхинче çак йĕркесен авторĕн Германирен килнĕ хăнасене, виççĕмĕш сыпăкри тăвансене, кĕтсе илсе чăваш халăхĕн йăли-йĕркипе паллаштармалла пулчĕ.
Элĕк районĕ Пĕтĕм тĕнчери “Тăнăçлăх чупăвĕ” çулăм эстафетине йышăннă. Сывă пурнăç йĕркине тытса пыма тата туслăхпа килĕшÿре пурăнма чĕнекен мероприяти планетăри çĕршывсемпе регионсен хушшинчи культура çыхăнăвĕсене çирĕплетет.
Çимĕкре Элĕк районĕнчи Чулкаçра Алексей Николаевич Иванова, Чечня Республикинчи çапăçусене хутшăнса 2000 çулта пуç хунăскере, вилнĕ хыççăн Паттăрлăх орденĕпе наградăланăскере, халалласа Асăну хăми уçнă. Ăна хăюллă салтак çуралса ÿснĕ çурт çине вырнаçтарнă.
ЧР патшалăх электрон тата кинодокумендаци архивĕнче кăçалхи ака уйăхĕнче Парне кунĕ пĕрремĕш хут иртнĕ.
Архивистсем республикăра пурăнакансенчен кино-, фото-, видеоаппаратура, сăнÿкерчĕксем, кĕскен каласан — кинематограф историйĕпе çыхăннă пур документа та йышăннă. Шăпах çавăн чухне кинотехнологи оборудованийĕн куравĕ «Украина-4» тата çутă хатĕрĕсен комплекчĕпе пуянланнă. Вĕсене Шупашкарта пурăнакан Людмила Крыловăпа Евгений Гордеев парнеленĕ.
Çĕнĕ Шупашкарти 40-мĕш ача садĕнче çак кунсенче ачасене вăхăтлăх йышăнма чарăннă. Сăлтавĕ — темиçе ача вар-хырăм пăсăлнипе аптăранăран больницăна лекни. Ĕç-пуç çĕртме уйăхĕн 17-18-мĕшĕсенче пулнă. Хальхи вăхăтра 13 ача хула больницин инфекци уйрăмĕнче сипленет.
ЧР Ял хуçалăх министерстви пурлăх никĕсне çирĕплетес тĕллевпе потребитель кооперативĕсен конкурсне ирттернĕ. Патăрьелпе Комсомольски районĕсенчи «Али» тата «НУР» кооперативсене суйласа илнĕ. Вĕсене пурĕ 11,73 миллион тенкĕлĕх грант парĕç. «Али» выльăх пусмалли, ашне тирпейлемелли, унран кăлпасси хатĕрлемелли цех тăвать.
Патăрьел районĕнчи тĕрлĕ харпăрлăхлă хуçалăхсен ертÿçисем иртнĕ çулсенчи пекех пухăнса кашни ял тăрăхне çитнĕ, ял хуçалăх культурисен калчисем еплерех шăтнине пахаланă. Район администрацийĕ çуракине пысăк пахалăхпа йĕркелесе ирттернĕшĕн «Батыревский» обществăна — 1-мĕш, «Исток» агрофирмăпа Н.Федоров хресчен хуçалăхне — 2-мĕш, «Малалла» эртеле, Р.Санзяповпа Ф.Чабатов фермер хуçалăхĕсене 3-мĕш вырăнсене панă.
Чăвашла верси
Русская версия
