Кăçалхи Пĕтĕм чăваш диктантне Геннадий Волков этнопедагога хисеплесе çырĕç. Кун пирки пире Чăваш патшалăх гуманитари ăслăлăхĕсен институчĕн ертсе пыракан ăслăлăх ĕçтешĕ Александр Кузнецов пĕлтерчĕ.
Чăваш Енре сĕте хальхи вăхăтра ял çыннисенчен пĕлтĕрхи çак вăхăтринчен хаклăрахпа туянаççĕ. Ака уйăхĕн 7-мĕшĕ тĕлне унăн литрне 19 тенкĕ те 20 пуспа пуçтарнă. Ку вăл çулталăк каяллахинчен 24 процент хаклăрах.
Пăрачкав районĕнчи механизаторсем ирхи шăнпа усă курса кĕрхисене апатлантараççĕ. Район администрацийĕнче хыпарланă тăрăх, хастарсем темиçе кунта 325 гектар çине удобрени сапнă та. Кунта "Никулинский" кооператив, А.Л. Васильева тата Л.Л. Васильева фермер хуçалăхĕсем çаврăнăçулăхпа палăрнă.
Ĕнер, ака уйăхĕн 9-мĕшĕнче, Чăваш патшалăх оперăпа балет театрĕнче Пĕтĕм тĕнчери балет фестивалĕ гала-концертпа хупăннă. Аса илтерер: ташăн çак ÿнерне кăмăллакансене театр ака уйăхĕн 3-9-мĕшĕсенче йышăнчĕ.
Чăваш Енĕн тĕп хулинче паян террора хирĕç акци иртнĕ. Вăл Шупашкарти Республика тÿремĕнче 11 сехетре пуçланнă.
Чăваш Енри ачасен "Артек" лагере тÿлевсĕр кайма шанчăк пур. Ун валли вĕсен Раççейри Экологи çулталăкне халалланă çĕршыври конкурсра палăрмалла. Конкурсра çĕнтернĕ 150 ытла ача экологи сменине хутшăнайĕ. Заявка пама шутлă вăхăт юлнă: заявление ака уйăхĕн 9-мĕшĕнче юлашки кун йышăнаççĕ.
Чăвашла верси
Русская версия
